Astanada Qazaqstannyń eńbek sińirgen óner qaıratkeri Seıdolla Báıterekovtiń shyǵarmashylyǵyna arnalǵan kesh ótti. Onyń «Álııa», «Kúnge tabyný», «Dos týraly jyr», «Túrkistan» ánderi mýzyka súıer qaýymnyń rýhanı azyǵyna aınaldy desek, artyq aıtqandyq bolmas.
«Álııa» áni dúnıege 1975 jyly kelgen eken. Kózi tirisinde sazger sol ánniń dúnıege kelýi jaıly bylaı dep tolǵanǵan edi: «Án oıymda biraz júrdi. Kúrdeli áýen jadymdy baýraı jóneldi. Basynda yńyldap qana júrdim. Birde Bákir Tájibaevtyń jyr jınaǵyn qolyma alyp, asha bergenim muń eken, kózime aqynnyń Álııa Moldaǵulovaǵa arnalǵan óleń joldary tústi. Jadymda júrgen áýenge salyp edim, quıyp qoıǵandaı dál keldi. Bul án arnaý emes, bul án – joqtaý. Balǵyn qyzdyń erligin ulyqtaý, el jadynda qaldyrý úshin osyndaı án qajet-aq».
Ol án sol kezde 17 jastaǵy ánshi Roza Rymbaevanyń oryndaýynda keńinen tanyldy. 1976 jyly «Altyn Orfeı» baıqaýynda shyrqalyp, birinshi oryndy ıelendi. Máskeýlikter «Álııa» ánin «Eń úzdik jyl áni» dep baǵalap, marapattaǵan bolatyn. «Álııa» áni arqyly jas ánshi Roza Rymbaeva kópshiliktiń kózaıymyna aınalyp, óner kóginde keńinen qanat qaǵýyna jol ashty. Sondaı-aq, «Álııa» áni kópshilikke sazger Seıdolla Báıterekovti de tanytty.
«Seıdolla óz zamanynyń tulǵasy. Búgingi urpaq ony úlgi tutyp, ánderin jattap júrýi tıis. Ol úshin ony elge odan ári tanytatyn osyndaı shyǵarmashylyq keshter dástúrli túrde ótip turýy qajet», – deıdi onyń jary Lázzat Muzarafqyzy.
Esildiń en jaǵasynda ótken keshke Roza Rymbaeva, «Jetigen» toby, Súndet Baıǵojın, Baǵdat Sámedınova, Jeńis Ysqaqova, Baqyt Shadaeva, Álı Oqapov, Áıgerim Qalaýbaeva, Serik Ibragımov, «Vıdmen» toby, «Lúpil» dýeti sekildi estrada juldyzdary qatysyp, sazgerdiń ánderin oryndady.
Raýan QAIDAR,
«Egemen Qazaqstan»