Elorda kúnine arnalǵan shattyqqa toly sharalardyń bir legi «Jeruıyq» saıabaǵynda jalǵasyn tapty. Onda kıiz úıler boı kóterip, Uly Dala halqynyń basty sýsyny qymyzǵa arnalǵan «Qymyzmuryndyq» halyqaralyq etnografııalyq festıvali ótkizildi.
Aıta keteıik, qalada 1992 jyldan bastap ótkizilip kele jatqan búgingi etnografııalyq merekeniń taqyryby el Táýelsizdiginiń 25 jyldyǵy men EKSPO-2017 kórmesi boldy. Ony ótkizý ıdeıasy elimizdiń ózge óńirlerinde Almaty, Pavlodar, Taraz, Shymkent jáne basqa qalalarda da qoldaý tapty.
Birneshe kún boıy kók shalǵynda ulttyq naqyshta bezendirilgen 10 kıiz úı tigilip, mol dastarqan jaıylyp, kópshilikke ulttyq taǵamdar: qurt, baýyrsaq, irimshik, shubat pen qymyz usynyldy. Al kireberiste qoldanbaly óner kórmesi kútip turdy. Sonymen qatar, etnoaýylda altybaqandar ornatylyp, jigitter men qyzdar saýyq-saıran quryp, án aıtyp, balýandar kúsh synasyp, sheberlikterin synǵa saldy.
Festıvaldiń ashylý rásiminde qymyzdy nasıhattaýǵa arnalǵan teatrlandyrylǵan qoıylym kórsetildi. Munymen qosa, kelýshiler shara barysynda qymyz týraly bilimin tekserip, qymyz ishýden jarysyp, qol kúres, arqan tartý jáne t.b. saıystardy tamashalady.
Astana kúnine oraı uıymdastyrylǵan aıtýly sharaǵa kórshiles Qyrǵyzstan, Omby, Altaı, Iаkýtııa syndy ulttyq sýsyndy dáripteýshi aımaqtardyń ókilderi de keldi.
«Biz Astanaǵa jetý úshin 18 saǵat boıy ushtyq. О́zimizben birge keremet qymyz alyp keldik. Festıval barysynda halyqqa óz sýsynymyzdy usynyp, qalyńdyqty kıindirý dástúrin kórsetpekshimiz. Sonymen birge, ártisterimiz homýz dep atalatyn ulttyq aspapta oınaıdy», – dedi Iаkýtııadan kelgen meıman Iаna Ignateva.
О́tkizilip kele jatqanyna 24 jyl bolǵan festıval bıyl birinshi ret halyqaralyq dárejede uıymdastyrylyp otyrǵanyn aıta ketsek deımiz. Salt-dástúr, ádet-ǵurypty dáriptep qana qoımaı, ulttar dostyǵyna da ıgi áserin tıgizetin, tatýlyqqa úndeıtin taǵylymdy shara ónerpazdardyń ónerimen óz jalǵasyn tapty.
Raýan QAIDAR,
«Egemen Qazaqstan»