Qazaqtyń belgili jazýshysy, aqyn, mádenıettanýshy, aýdarmashy jáne dramatýrg, fılosofııa ǵylymdarynyń doktory Áýezhan Qodar qaıtys boldy. Bul týraly 9 shilde kúni aqyn Aqberen Elgezek Facebook jelisindegi óziniń paraqshasynda habarlady.
«Áýezhan Qodar aǵamyz dúnıeden ótti degen qaraly habar alyp jatyrmyz. Keshe ǵana jas qalamgerler týraly serıaly maqalalar jazyp, jas talanttarǵa serpin bergen aǵamyzdan aıyrylyp qalǵanymyz ókinishti-aq. Baǵasyn bildik pe, joq pa, ol da suraq...
Qazaq oıynyń bir úlken asqary edi, jaryqtyq. Imany joldas, jany jánnattyq bolsyn. Alla aldynan jarylqasyn», - dep jazady Elgezek.
Áýezhan Qodar 1958 jylǵy 12 maýsymda Qyzylorda oblysynyń Qarmaqshy aýdanyndaǵy Abyla temirjol beketinde týǵan. 1982 jyly QazMÝ-dyń zań fakýltetin bitirgen. 1982–1985 jyldary Qyzylorda oblysy, Qarmaqshy aýatkomynyń jasóspirimder jónindegi komıssııanyń hatshysy, 1989–1994 jyldary Qazaqstan Jazýshylar odaǵy janyndaǵy kórkem aýdarma jáne ádebı baılanystar jónindegi redaktory bas alqasynda orys bóliminiń meńgerýshisi, 1994 jyldan Qazaqstan halyqtarynyń mádenıetin qorǵaý jónindegi «Altyn ǵasyr» qoǵamdyq birlestiginiń prezıdenti boldy. 1997–1998 jyldary Nemis teatr akademııasynda fılosofııa tarıhynan dáris berdi. 1999 jyldan «Tamyr» jýrnalynyń bas redaktory bolyp keldi.
Eki tilde birdeı jazatyn Áýezhan Qodar jazýshylyqtaǵy jańa tolqynnyń ókili edi. Jazýshynyń qalamynan «Týǵan kún», «Aqedildiń anty» pesalary (1986), «Qanatty órnek» (1990), «Abaı (Ibrahım) Qunanbaev» jınaǵy (1996), «Eske almaý sheńberi» (1998), «Qazaq ádebıetiniń tarıhyna sholý» (1999) kitaby, «Qanaǵat qaǵanaty» jınaǵy (1994) týdy. Ol qazaq tiline E.Zamıatınniń «Attıla» dramasyn, M.Haıdetter, H.Gasettiń fılosofııalyq eńbekterin, Shvıtterstiń óleńderin, al orys tiline Abaı, Maǵjan, J.Jaqypbaev shyǵarmalaryn aýdarǵan. Qodar respýblıkalyq shyǵarmashylyq jastar «Jiger» festıvaliniń laýreaty edi.
Jazýshy bala jasynan múgedek boldy. «Men tórt jasymnan aýyrdym, - dep jazdy ózi bul týraly. – Birde áke-sheshem meni qonaqqa alyp bardy. Úıge kelgen kezimizde men kenetten eki aıaǵymnyń birdeı júrmeı qalǵanyn bildim. Jalpy, sumdyq bir jaǵdaı oryn aldy. Medbıkeni shaqyrtty. Ol kelip ıne shanyshty. Biraq sodan keıin bezgek ustaǵandaı bolyp aýyryp, tipti qaqsap ketti. Meniń yrymshyl ata-anam muny kóz tıgennen boldy dep eseptep, meni dárigerlerge aparýdyń ornyna, ártúrli emshilerge, baqsylar men balgerlerge súıreı bastady. Keıin munyń polıomelıt degen naýqas ekeni anyqtaldy».
О́mirden osyndaı aýyr taǵdyrly talantty qalamger ótip bara jatyr.
Jatqan jeriń jaıly, topyraǵyń torqa bolsyn!
Murat AITQOJA.