Qytaıdaǵy jańa týǵan tórtemge osyndaı esimder qoıyldy
QHR-dyń Jıchjao qalasynda tórtem ómirge keldi. Balaǵa laıyqty at qoıý ońaı emes ekeni belgili. Al jańa týǵan shaqalaqtarǵa ata-anasy Sıaodýn (Shyǵys), Sıaonan (Ońtústik), Sıaosı (Batys) jáne Sıaobeı (Soltústik) degen esim berýdi jón kóripti.
Olar – otbasynyń tuńǵyshtary. Nárestelerdiń 27 jastaǵy anasy Lı Szıýan men jarynyń otaý qurǵanyna birneshe jyl bolsa da, osy ýaqytqa deıin qursaq kótere almaǵan. Áýlıe kezip, jer-jahandy aralamasa da, dárigerlerdiń kómegine jıi júginip otyrypty. Aq halattylardyń nusqaýymen arnaıy preparattar qabyldaǵan. Sodan arada kóp ýaqyt ótpeı boıyna bala bitipti. Bir emes, tórt sábıge aıaǵy aýyr ekeni belgili bolǵan. Al 4 shilde kúni, júktiliktiń 33-shi aptasynda eki qyz ben eki uldy bosanǵan.
Sábıler shala týǵan. Eń kishkentaıynyń salmaǵy shamamen – 1,75 kılo. Endigi bir aı kóleminde dárigerlerdiń baqylaýynda, ıntensıvti bólimshesinde bolady.
Aıan ÁBDÝÁLI,
«Egemen Qazaqstan»