Almatydaǵy Dostyq úıinde uzaq merzimdi ekonomıkalyq-mádenı baılanystardy naqtylaı túsý maqsatynda Qazaqstan-Koreıa yntymaqtastyq forýmy bolyp ótti.
Forýmǵa Qazaqstan halqy Assambleıasy Tóraǵasynyń orynbasary – Hatshylyq meńgerýshisi Eraly Toǵjanov, Koreıa Respýblıkasynyń Almaty qalasyndaǵy bas konsýly Djon Syn Mın, «KOTRA» saýda jáne ınvestısııalar jónindegi agenttiktiń dırektory Djong Ýe Iong, «Caspian group» AQ basqarmasynyń tóraǵasy Iýrıı Shaı, «Memleket-jekemenshik seriktestiginiń qazaqstandyq ortalyǵy» AQ basqarma tóraǵasynyń orynbasary Ǵalymbek Mamraev, «KAZNEX INVEST» Almaty ókildiginiń dırektory Sábıt Narbaev, «Atameken» ulttyq kásipkerler palatasy Almaty qalalyq bólimshesi dırektorynyń orynbasary Tımýr Hakımov qatysty.
Sondaı-aq, ekijaqty tıimdi qatynastar tereń qozǵalǵan jıynda Parlament Májilisiniń depýtattary, Qazaqstan halqy Assambleıasynyń músheleri, respýblıkalyq etnomádenı birlestikterdiń basshylary, otandyq kásipkerler men Ońtústik Koreıadan, Reseı, Qyrǵyzstan, О́zbekstannan kelgen sheteldik kásipkerler ózara tájirıbe almasyp, aldaǵy ýaqytta tyǵyz baılanystar ornatýǵa mámile jasady.
– Qazaqstan men Ońtústik Koreıanyń ekonomıkalyq-mádenı qatynasy egemendik alǵan kezden bastap jaqsy jolǵa qoıylǵany málim. El irgesi bekip, memleket óziniń damý jolyna túsken kezeńde ońtústikkoreıalyq áriptesterimiz el ekonomıkasyna eleýli ınvestısııa salyp, ekijaqty qatynastyń ilgeri basýyna zor yqpal etti. Endi, Qazaqstan úshin asa úlken mańyzǵa ıe EKSPO-2017 halyqaralyq kórmesi aıasynda da osy baılanysymyzdy jańa beleske kóteremiz dep senemiz, – dedi Qazaqstan halqy Assambleıasy Tóraǵasynyń orynbasary Eraly Toǵjanov.
Forým qazaqstandyq jáne ońtústikkoreıalyq bıznesmender, basqa elderden kelgen seriktester úshin ınvestısııalar tartý, qolaıly bıznes-orta qurý, ákimshilik kedergilerdi joıý jáne basqa da mańyzdy máseleler talqylanǵan dıalog alańy bola bildi. Yntymaqtastyq júzdesýler aıasynda Qazaqstan koreıleri qaýymdastyǵy men Koreıa Respýblıkasynyń ózara is-qımyl jasaýy mysalynda, etnomádenı birlestikterdiń Qazaqstan men etnostardyń tarıhı otany bolyp tabylatyn elder arasyndaǵy halyqtyq dıplomatııa tetigi retindegi róli qaraldy.
Qanat ESKENDIR,
«Egemen Qazaqstan»
ALMATY