Byltyr medısına qyzmetkerleri úshin mereıli jyl boldy. 225 joǵary bilimdi dárigerler men meıirbıkeler jaıly páterlerge jaıǵasyp, úlken qýanyshqa kenelgen bolatyn. Bıyl jaqsy dástúr odan ári jalǵasyn tapty.
Jaqynda «Iýbıleınyı» shaǵyn aýdanynda 75 páterli úıdiń qurylysy aıaqtalyp, aq halatty abzal jandardyń ıgiligine berildi. Onyń ashylý saltanatyna qatysqan oblys ákimi Serik Bilálov Elbasy Nursultan Nazarbaev Qazaqstan halqyna Joldaýynda turǵyn úı saıasatyna úlken basymdyq bergenin, azamattardyń ómir sapasynyń ozyq kórsetkishi – turǵyn úı jaılylyǵynyń deńgeıin arttyrý baǵytynda úlken mindetter júktelgenin aıta kelip, ótken jyly 100 myń sharshy metr baspananyń qoldanysqa berilgenin jetkizdi.
Páterdiń kiltteri perınataldyq ortalyqtyń akýsher-gınekology Iýlııa Elsınaǵa, №2 qalalyq emhananyń meıirbıkesi Baqytjan Qadyrbekovaǵa, ýchaskelik dáriger Altyn Karabalınaǵa, taǵy basqalaryna saltanatty túrde tabys etildi. Olardyń arasynda medısınalyq akademııany bitirip kelgen jas maman Arman Músáıipovtiń otbasy da bar. Jumys ótili shırek ǵasyrǵa jýyqtaǵan qalalyq balalar emhanasynyń pedıatry Márııamgúl Sarıeva jaıly baspana buıyrǵanyna dán rıza. Kardıologııalyq ortalyqtyń meıirbıkesi Oksana Ýdarseva elimiz táýelsizdik alǵan jyly eńbek jolyn bastaǵan eken. Sodan beri bir salada tapjylmastan eńbek etip kele jatqanyn maqtanysh etedi.
О́mir ESQALI, Petropavl.