Aqparat jáne kommýnıkasııalar mınıstri Dáýren Abaev Almaty qalasynda «Qazteleradıo» AQ-tyń bazasynda ótken jıynǵa qatysty. Is-shara barysynda analogtyq efırlik teletaratylymdy Qazaqstan Respýblıkasynyń aýmaǵynda kezeń-kezeńmen toqtatý máselesi talqylandy.
Mınıstrdiń aıtýynsha, sıfrlyq efırlik teletaralymdy qoldanysqa engizý jáne damytý, sapaly sıfrlyq otandyq telearnalardyń halyqqa qoljetimdiligin qamtamasyz etý – áleýmettik turǵydan mańyzdy joba.
– Analogtyq efırlik taratylymnyń kezeń-kezeńmen óshirilýi mobıldi baılanystyń damýyna, analogtyq jelimen qyzmet kórsetý shyǵyndaryn azaıtýǵa, halyqaralyq mindettemelerdi oryndaýǵa jáne aýdandyq teleradıo habarlaryn taratýdyń órkendeýine sebep bolmaq, – dedi D.Abaev.
Búgingi kúni analogtyq jáne jer betindegi sıfrlyq taratylym jelileri qatar jumys isteýde. Analogtyq taratylym jelisimen memlekettik telearnalardyń habar taratýy úshin jyl saıyn jumsalatyn memlekettik shyǵyndar shamamen 1,2 mlrd. teńgeni quraıdy.
Sondaı-aq, is-sharalardy iske asyrý merzimderin uzartý uıaly baılanystyń tórtinshi býyny 4G-di engizýge kedergi týǵyzady.
Sonymen qatar, jıyn barysynda ulttyq teleradıo habarlaryn taratý jelisin «Intelsat-904» sheteldik spýtnıginen otandyq KA «KazSat-3» spýtnıgine aýystyrý máselesi talqylandy.
– Jelini sheteldik spýtnıkten otandyq spýtnıkke aýystyrý tehnıkalyq turǵydan da, saıası turǵydan da qajet bolýda. Osyǵan baılanysty «OTAU TV»-niń barlyq abonentterin qazaqstandyq «Qazsat-3» spýtnıgine kóshirýge kúsh salýymyz kerek, – dedi mınıstr.
Mınıstrdiń aıtýynsha, aýystyrýǵa qatysty barlyq tehnıkalyq is-sharalar osy jylǵy qyrkúıek aıynyń aıaǵyna deıin aıaqtalýy qajet.
Jıyn sońynda BAQ arqyly halyqqa aqparattyq nasıhat júrgizýdi kúsheıtý týraly tapsyrma berildi. «Qazteleradıo» AQ-qa «OTAU TV» abonentteriniń «Qazsat-3» spýtnıgine tolyqtaı kóshirilýi jáne jergilikti organdarmen birlese otyryp, ataýly áleýmettik kómek alatyn otbasylarǵa sıfrlyq efırlik taratylym qyzmetterin qosý máselesin ázirleý tapsyryldy.
«Egemen-aqparat»