Aqylbektiń «altyn» taýyqtary

«Eńbek etseń erinbeı, toıady qarnyń tilenbeı» degen naqyl sóz Zelenov aýdanyna qarasty Peremetnyı aýylynyń turǵyny Aqylbek Almanbetovtiń ómirlik ustanymy. Eńbekqor jigit óz qo­ra-qopsysynan shaǵyn qus fabrıkasyn ashyp al­ǵan. Kú­nine 80-90 jumyrtqa beretin fabrıka osy kúni paıda túsire bas­tapty. – Barbastaý jaǵynda turatyn dosymnyń qus fabrıkasy bar, soǵan qarap ylǵı qyzyǵyp jú­retinmin. Bir kúni sonda barǵan­da, osyndaı jumysty men de istep kórsem, qalaı bolar eken degen oıǵa qaldym. Sóıtip, úıge kelgen soń taýyq turatyn arnaıy orynnyń qalaı jasalatynyn ǵalamtor jelisinen qarap, ólshemderin shyǵardym. Bul ba­ǵyttaǵy jumysymdy dosym da quptap, maǵan kóp keńes berdi, – dedi ol kásibin qalaı bastaǵanyn suraǵanymda. Búginde 100-ge jýyq taýyq asy­rap otyrǵan shaǵyn «fabrıka» ıesi jeke kásipkerligin quryp, taýyqtarynyń ónimin oblys or­talyǵyna ótkizedi. – Bul isti bastaýǵa bar bolǵa­ny 50 myń teńge qarajat jumsa­dym. Taýyqtardy Oraldaǵy qus fabrıkasynan satyp aldym. Ba­synda neshe túrli qospa jep jaman úırengen taýyqtar aýyrdy. Ol kezde jumyrtqalary da kó­ńilimnen shyqpaıtyn edi. Qazir taýyqtarym taza ónimge úıren­di. Jumyrtqalary da jaqsy, – dep shaǵyn bıznesin bastaǵan kezde­gi qıyndyqtaryn eske alady Aqyl­bek. Keıipkerimizdiń shaǵyn «fab­rı­­kasy» elek­trondy túrde ju­mys jasap tur­masa da, ónimin berip tur. Ta­ýyqtardyń astyn ta­za­lap, zalalsyzdandyrý jumysta­ryn júrgizip turatyn jigit qys kezinde aýyl­dyń bir azamatyn qa­syna kómekke alyp, ony ju­myspen qamtamasyz etip otyra­tyndyǵyn da aıtty. – Jasaımyn degen adamǵa qaı kezde de jumys tabylady. Tek jalqaýlyqty ysyryp qoıyp, oı­laǵan isin aıaǵyna deıin jetkizý­di kózdese ǵana boldy. Al «maǵan anaý jetpeıdi, mynaý az» dep syl­taýrata berseń, eshbir iste be­reke bolmaıdy, – degen ol bola­­shaq­ta shaǵyn qus «fabrıkasyn» keńeıtýdi kózdep otyr. Eshkimniń qoldaýynsyz, óz eńbeginiń arqasynda ba­la-shaǵa­syn asyrap, basqany da jumys­pen qamtyp otyrǵan Aqyl­bekteı azamattardyń isi ózge­ler­ge úlgi bolsa eken deımiz. Túgelbaı BISEN Batys Qazaqstan oblysy, Zelenov aýdany