Astana kúni qurmetine ár óńir tamasha tartýlar ázirlegen bolatyn. Sonyń biri Shardaradaǵy teńiz jaǵasynan zamanaýı úlgide salynǵan eki qabatty jańa murajaı. Oblystyq bıýdjetten bólingen 107 mln. teńgege aýmaǵy 1800 sharshy metr bolatyn ǵımarat qurylysyn byltyrǵy jyldyń shilde aıynan bastaǵan «Jer-Sý-Jol-Servıs» JShS belgilengen merzimde oıdaǵydaı aıaqtap shyqty.
Mádenıet oshaǵynyń ashylý saltanatynda oblystyq máslıhattyń hatshysy Qamytbek Aıtóreev, oblys ákiminiń orynbasary Jaqyp Bókenbaev, aýdan ákimi Arman Abdýllaev, oblystyq tarıhı-ólketaný murajaıynyń dırektory Gúlnár Arenova turǵyndardy qýanyshtarymen quttyqtap, murajaı úıi aldaǵy ýaqytta halyqtyń rýhanı azyǵyna aınala bersin degen tilekterin arnady.
Qurylys jumysyn óz dárejesinde júrgizgen «Jer-Sý-Jol-Servıs» seriktestiginiń bas ınjeneri Qanat Erjigit jańa nysannyń kiltin aýdandyq tarıhı-ólketaný murajaıynyń dırektory Nurlan Symaıylovqa saltanatty jaǵdaıda tabystady. Merekelik kúıge bólengen qala turǵyndary men ardagerler zamanaýı talapqa saı salynǵan qos qabatty úıdiń ásem kórkin qyzyqtady. О́ıtkeni, ol arhıtektýralyq symbaty men aýmaǵy jaǵynan oblystaǵy birden-bir aıshyqty ǵımarat bolyp tabylady. Ári bıylǵy elorda kúni qurmetine syıǵa tartylǵan shashýlardyń ishindegi eń aıtýlysy deýge laıyq.
Ár memlekettiń tól mádenıeti men salt-dástúri, tarıhy men taǵylymy qashanda murajaı úıi arqyly nasıhattalyp kelse, bul jaǵynan shardaralyqtardy marqaıtatyn úlken jetistik osy bolyp qalmaq. Endi alda jańa murajaıdyń ishin qundy jádigerlermen toltyrý mindeti tur.
Ádil ÁBDIRAMANOV
Ońtústik Qazaqstan oblysy