Bul jumys oblys ortalyǵynyń jasyl bolashaǵy úshin qabyldanǵan «2015-2020 jyldarǵa arnalǵan qalanyń saıabaqtar aýmaǵyn damytý tujyrymdamasy» aıasynda jasalyp, iske asty. Qazirgi kezde oblys ortalyǵynda jalpy kólemi 172 gektardy quraıtyn parkter (5), saıabaqtar (28), alleıalar (22) kiretin 55-ten astam kógaldandyrylǵan aýmaq bar. Qala ákimdiginiń tujyrymdamasyna sáıkes jaqyn aradaǵy úsh jyl ishinde 37 abattandyrylǵan aýmaq kógaldandyrylady. Gagarın atyndaǵy demalys parkin abattandyrý jáne qalalyqtarǵa qolaıly orta jasaýǵa erekshe kóńil bólindi. Rasynda da saıabaq buryn kúl-qoqystan kóz ashpaı jatty. Kim kóringen, kezbeler osy baqty panalady. Qaraýsyz qalǵan soń aǵashtary da otala bastady. Onda eshqashan jańartý, jańǵyrtý jumystary júrgizilmedi. Qalanyń sheti, aınala toly zaýyttar, qaptaǵan ónerkásip oryndary. 1978 jyldary ashylǵan baqta jumysshylar demalsyn degen maqsat bolsa kerek. Ekologtar endi saıabaqtaǵy topyraq qabatyn tazartý, burynǵy aǵashtardy saqtap, qaıtadan otyrǵyzý, gúl ósiretin alańdardy kóbeıtý, dárethanalar jasaýdy surap otyr. Saıabaq ónerkásiptik aımaqtyń janynda ornalasqan. Budan qandaı demalys, tynyǵý,taza aýa jutý kóre alamyz degen suraqtar mazalaıdy. Sondyqtan, otyrǵyzylatyn aǵashtardyń tuqymyn tańdaý kezinde olardyń sándik kórki úshin ǵana emes, sonymen qosa aýany ottegimen qanyqtyrýǵa jáne qorshaǵan ortany saýyqtyrýǵa yqpal etetin fıtonsıdterdi bólip shyǵarý qabiletin eskerý kerek dep otyr ekologtar. Qaıtadan paıdalanýǵa berilgen saıabaqty ǵaryshker Toqtar Áýbákirovtiń esimimen ataý jóninde sheneýnikterdiń ózderi usynys jasaǵan bolatyn-dy. Saıabaqqa jaqyn Gagarın atyndaǵy kóshe de bar. Táýelsizdik kúni ashylǵanyna qaraǵanda, aty da ózgerip qalýy múmkin. Farıda BYQAI, «Egemen Qazaqstan PAVLODAR