Bas redaktorlar klýby Eýrazııalyq toptyń qoldaýymen qazaq tildi jýrnalıster arasynda ótkizilgen dástúrli VI «Altyn qalam» baıqaýynyń jeńimpazdaryn marapattady. Onda «Úzdik maqala» nomınasııasy boıynsha júldeli ekinshi oryndy áriptesimiz «Egemen Qazaqstan» respýblıkalyq gazetiniń Qostanaı oblysy boıynsha menshikti tilshisi Názıra Járimbetova jeńip aldy.
Bul baıqaýdyń basty maqsaty – Eýrazııalyq top kásiporyndarynda jumys isteıtin, óndiristegi qarapaıym eńbek adamdaryn búgingi beıbit zamannyń qaharmandary retinde úlgi etip, nasıhattaý. Alty jyldan beri jalǵasyp kele jatqan baıqaýǵa bul joly respýblıkalyq jáne óńirlik basylymdardyń, sondaı-aq teledıdar, radıo jáne ınternet jarııalanymdarynyń 37 jýrnalısi nıet bildirip, 133 maqala men vıdeo-aýdıo materıaldaryn jibergen eken. Olardyń arasynda 22 tilshiniń 57 materıaly talapqa saı dep tanylyp, komıssııa talqysyna túsip, oń baǵasyn alǵan.
Júlde qory 2 mln. teńgeni quraıdy. Astanada uıymdastyrylǵan sharaǵa BAQ ókilderimen qatar, birqatar oqyrmandar, kórermender jáne tyńdarmandar qatysty.
Sharada sóz alǵan «Egemen Qazaqstan» gazetiniń basqarma tóraǵasy Darhan Qydyráli áriptesterdi júldelerimen quttyqtap, únemi sóz maıdanynyń aldyńǵy shebinde júrip, halyqqa shynaıy aqparat jetkizýdi kásip etken altyn qalam ıelerine júrek jardy tilegin jetkizdi. Sonymen qatar, Túrkııada bolǵan qasiretti oqıǵa men Almatyda oryn alǵan qaıǵyly jaǵdaıǵa qatysty óz ókinishin jetkizdi. Osyndaı jaǵdaıda jurtqa shynaıy aqparat jetkizetin jýrnalısterdiń qazirgi jaýapkershiligi asa joǵary bolýy kerek ekenin basa aıtty.
Altynshy ret ótkizilip otyrǵan «Altyn qalam» baıqaýynyń bul jolǵy júldeleri negizinen aımaqtardaǵy jýrnalısterdiń «qanjyǵasyna» baılandy. Sonymen, «Úzdik maqala» nomınasııasy boıynsha 1-oryndy «Aqtóbe» gazetiniń tilshisi Kámshat Qopaeva, 2-oryndy «Egemen Qazaqstan» gazetiniń Qostanaı oblysy boıynsha menshikti tilshisi Názıra Járimbetova ıelendi. Al «Úzdik sıýjet» nomınasııasy boıynsha 1-oryndy «Astana» telearnasynyń jýrnalısi Aıgúl Shaıhımova, 2-oryndy 24.kz telearnasynyń Pavlodardaǵy menshikti tilshisi Qarlyǵash Qasıetova jeńip aldy. Sol sııaqty, 3-oryn «Qazaqstan» RTRK Qaraǵandy oblystyq fılıalynyń jýrnalısi Áshimhan Janpeıisov pen Pavlodar oblystyq «Halyq» radıosynyń tilshisi Raýshan Sybanjanovaǵa buıyrdy.
Áriptesterimizdi júldeli jeńisterimen shyn júrekten quttyqtaı otyryp, qalamdarynyń altyn qalpynan aınymaýyn tileımiz.
Nurbaı ELMURATOV
Foto: Erlan Omarov