Bıyl Oral óńirinde egin óte bitik shyqty. Kúzdik bıdaıdyń shyǵymdylyǵy ortasha eseppen alǵanda 40 sentnerden asyp túsedi. Sońǵy ret qaı jyly osyndaı rekordtyq ónim jınalǵanyn batysqazaqstandyq astyq ósirýshiler esterine túsire alatyn emes. Mundaı jaǵymdy jaıt aımaqtyń eń astyqty aýdany Zelenovta bolyp otyr. Mundaǵy «Matevosıan» sharýa qojalyǵyna qarasty egin oryp júrgen amerıkalyq «Djon-Dır» kombaındary teńizdeı terbelgen bıdaı sabaqtaryn baýdaı túsirip barady. Osy kóriniske kýá bolǵan oblys ákimi Altaı Kólginovtiń júzi de tym jaıdary kórindi.
Kókjıekpen kómkerilgen egindikke súısine ári rıza bolyp turǵan oblys basshysy bir kezde alqapta júrgenderdi tań-tamasha qaldyryp jaqyndap kelip toqtaǵan kombaın shtýrvalyna baryp otyrdy. Ol eń áýeli «Djon-Dırdy» basqarý óte yńǵaıly ári qolaıly ekenine kózin jetkizdi. Basqarý kabınasy túgeldeı áınektelgen, shtýrval ıesiniń jan-jaǵyn jiti baqylap otyrýyna tolyq múmkindik bar. Avtomattandyrylǵan egin orý tehnıkasynda aýa baptaǵysh qurylǵyǵa deıin oılastyrylypty.
Oblys ákimi esh taısalmastan ony júrgizý tetigin basqan kezde dala kemesi qazdaı qalqyp qozǵala berdi. Kóp júrmeı-aq júzdegen metr alǵa ozǵan kezde onyń býnkeri badanadaı altyn dánge toldy da qaldy. Osylaısha óńir basshysy bıylǵy jyly qambaǵa quıylatyn qut-bereke men yrysqa óz qolymen orylǵan 48 sentner bıdaıdy qosty. Osyndaıda tehnıka tilin bilý esh ýaqytta artyqtyq etpeıtinine kózim odan ári jete túskendeı kúı keshedi ekensiń. Ári tehnıka bolǵanda qandaı?! Zamanaýı, eń sońǵy úlgidegi alymdy da, shalymdy kombaın. Sirá, muny oblys ákiminiń kópshilikke kórsetken taǵy bir ónegesi desek jarasar.
Temir QUSAIYN,
«Egemen Qazaqstan»
Batys Qazaqstan oblysy, Zelenov aýdany