Astanadaǵy Ana men bala ulttyq ǵylymı ortalyǵynda el Táýelsizdiginiń 25 jyldyǵyna oraı, «Baıqa jolda, balaqaı!» taqyrybymen teatrlandyrylǵan qýyrshaqtar qoıylymy ótti. Qazaqstan halqy Assambleıasy qoǵamdyq qorynyń «Shyn júrekten» qaıyrymdylyq telemarafony aıasynda uıymdastyrylǵan saltanatty shara leıkoz, onkologııa jáne aýyr syrqatqa shaldyqqan balalardy qoldaýǵa baǵyttalǵan.
Qamkóńil ana men syrqat balaǵa erekshe qýanysh syılaýǵa arnalǵan jıynda sóz alǵan Qazaqstan halqy Assambleıasynyń qoǵamdyq qory dırektorynyń orynbasary Talǵat Balpyshev mundaı qaıyrymdylyq sharalarmen 6 jyldan beri belsendi aınalysyp kele jatqandyǵyn aıtady. «Biz tap osy Ana men bala ǵylymı ortalyǵynyń onkologııa bólimine turaqty túrde udaıy kómektesip turamyz. Bıyldyń ózinde bul ortalyqqa osymen úshinshi kelýimiz. Bul joly biz súıek kemigi syrqatyna ushyraǵan janǵa dálme-dál sáıkes keletin reseılik azamattyń donorlyǵyn qamtamasyz etýdemiz», – dedi ol.
Jalpy, QHA qoǵamdyq qory el ishinde shuǵyl kómekke muqtaj jandarǵa árkez qolushyn sozyp keledi. Ásirese, qor qyzmetkerleri áleýmettik jaǵdaıy az qamtylǵan otbasy balalary men aýyr dertke ushyrap, shıpa izdegen jandardyń janynan tabylýǵa tyrysady. Sondaı-aq, bul uıym azamattarǵa materıaldyq qajettilikterdi óteýmen ǵana shektelmeýde. Oıyn-saýyq baǵytyndaǵy saltanatty jıyndarǵa qýyrshaq teatrlaryn qatystyrý arqyly búldirshinderdi shattyqqa keneltýde. Olardyń ata-analarymen de jaqyn aralasyp, psıhologııalyq turǵyda qoldaý bildirýge árkez daıyn.
Al merekelik jıynǵa shańyraq ıesi retinde qatysqan «UMC» korporatıvtik qory» fılıalynyń dırektory Bekbaı Haırýllın mundaı ıgi isti qoldap, qýattaıtyndyǵyn bildirdi. «Biz, árıne, naýqas balalarymyzdyń tezirek saýyǵyp ketýine tileýles bolyp, osyndaı kómek kórsetilip jatqanyna dán rızamyz. Sondyqtan da uıymdastyrýshylarǵa zor alǵysymdy bildiremin. Al endi jýyrda ǵana ortalyq 2016-2017 jyldarǵa gemopoetıkalyq baǵanaly jasýsha (GBJ) donorlyǵynyń halyqaralyq tizimine avtorızasııalaý úderisin júrgizdi. Sonyń aıasynda QHA qoǵamdyq qorynyń tikeleı kómegimen Reseıden donor tabylyp, endi ony júzege asyrý múmkindigi týyp otyr», – dedi Bekbaı Eslámuly.
Aıta keteıik, búginde «UMC» korporatıvtik qoryna qarasty Ana men bala ǵylymı ortalyǵy fılıalynda 100-den astam bala túrli deńgeıli dertke shaldyǵyp, em-dom qabyldaýda. Al jasóspirimderdi syrqat azabynan arashalaıtyn mundaı qyzmet kórsetý respýblıka boıynsha Astana men Almatyda ǵana iske asyrylady. B.Haırýllınniń aıtýynsha, ótken aptada eki balaǵa óte kúrdeli operasııa jasalǵan. «Biz áli týra osyndaı dıagnozben jatqan 5-6 búldirshinge operasııa jasaýymyz kerek», – dedi ol.
Memleket basshysynyń arnaıy jarlyǵymen qurylyp, jumys istep jatqan bul ortalyq búginde Qazaqstannyń táýelsizdik jyldaryndaǵy eń tańdaýly jetistikterdiń biri bolyp sanalady. О́ıtkeni, bul jer ult saýlyǵyn nyǵaıtýǵa qomaqty úles qosyp qana qoımaı, álemdik deńgeıdegi eń kúrdeli operasııalar da júzege asyrylatyn ozyq úlgili ortalyqqa aınalyp úlgerdi.
Nurlybek DOSYBAI,
«Egemen Qazaqstan»
ASTANA