Úshqońyrdyń bal shyryny

    Almaty oblysy, Qarasaı aýdanynda avstralııalyq qondyrǵynyń kómegimen jemisti syǵý arqyly Qazaqstanda eń birinshi bolyp «ECO JUICE» shyryny shyǵarylýda. Dámi til úıiretin bal shyrynnyń ereksheligi qutysynda bolyp tur. Qant pen boıaýdy jolatpaı tek je­mistiń sóli ǵana syǵyp quıylǵan ydysyn ashyp, shólińizdi basqan soń qalǵanyn úsh aıǵa deıin saqtaýǵa bolady. Osy ýaqyt aralyǵynda sýsynnyń dámi bastapqy qal­pynan ózgermeı balǵyn qalpyn saqtaıdy. Respýblıkamyzda al­ǵash ret qoldanysqa engen bul teh­nologııanyń basty ereksheligi nemese utymdy tusy sýsyn quıy­latyn begınboks – qoraptaǵy qalta dep atalatyn paketke shaǵyn shólmek ornatylǵan. Tutynýshylar alma, almurt, sábiz jáne qyzylsha shyrynyn ózge tetropaketter sııaq­ty emes, tek qoraptaǵy belgilengen oryn­nan osy shólmekti shyǵarý arqyly ydysqa quıyp ishedi. «Aýdanymyzdaǵy 100-ge jýyq baý-baqsha birlestiginen jınalǵan ónim iriktelip, óńdelgen soń osy óndiris ornynda bir saǵatta 500 lıtr shyryn shyǵarylady. So­nymen qatar 150 kılo alma tosaby alynady. 2008 jyly «Kazakh Cool» degen ataýmen óz isin bas­­taǵan seriktestiktiń negizgi maqsaty jemisti óńdep, saqtaý bolatyn. Birden 2200 tonna ónimdi ger­manııalyq tehnologııa arqyly uzaq merzimge deıin saqtaı alatyn kameralarymen erekshelenedi. Zamanaýı joǵary tehnologııaly jemis-jıdek qoımasy qazirgi tańda tek ataýyn ózgertip qana qoı­­­maı, jańa serpilister men múm­­kindikterge jol ashyp otyr. Osylaısha, naryqqa jańa jyldan bastap shyǵyp, eshqandaı qantsyz, qospasyz dámi til úıiretin shyry­ny aldaǵy ýaqytta qazaqstan­dyq dúken sórelerinen ǵana oryn al­yp qoımaı, alys-jaqyn shetelderge de eksporttalmaq», dedi Qa­ra­saı aýdanynyń ákimi Mahabat Bıgeldıev. Nurbol ÁLDIBAEV, «Egemen Qazaqstan» Almaty oblysy, Qarasaı aýdany