Aýyl sharýashylyǵy mınıstrligi Qazaqstannyń barlyq oblystaryndaǵy fermerlerge tegin oqytý semınarlaryn uıymdastyrady. Osy bıýdjettik baǵdarlamany júzege asyrýǵa memleket shamamen bir mıllıard teńge kóleminde qarajat bólip otyr. Bul týraly Úkimettiń resmı saıty habarlady.
Baǵdarlamany «Atameken» Ulttyq kásipkerler palatasy júzege asyratyn bolady. Sol úshin bıylǵy jyldyń maýsymynda palata arnaıy agroquzyretter ortalyǵyn qurdy. Osy ortalyq dırektory Tóleýtaı Rahymbekovtiń aıtýynsha fermerlerdiń negizgi máselesi aqparattyń jetispeýshiligi bolyp tabylady.
«Biz barlyq Qazaqstan boıynsha 600 semınar ótkizýdi josparlap otyrmyz jáne on myńnan astam fermerdi qamtamasyz etemiz. Semınar Aýyl sharýashylyq mınıstrligi anyqtaǵan negizgi 25 baǵyt boıynsha ótkiziledi. 13-si mal sharýashylyǵy boıynsha jáne 12-si ósimdik sharýashylyǵy boıynsha. Negizgi máselelerdiń biri – aqparatpen jetkilikti qamtamasyz etpeý. Barlyq fermerler aýyl sharýashylyǵynyń mamandary emes. Sondaı-aq, mamandardyń ózi bilimdi únemi jetildirip otyrý kerektigin aıtady. Bizdiń fermerler barlyq ınnovasııalyq óńdeýdi bilýleri tıis» – dedi T.Rahymbekov.
Sonymen qatar, baǵdarlamaǵa sheteldik 25 maman atsalysýda. Qazaqstandyq dáris oqýshylardy olar semınardyń ádisimen tanystyratyn bolady.
«Qarasha aıyna deıin Qazaqstannyń barlyq oblystaryn qamtýdy josparlap otyrmyz. Bizdiń maqsatymyz 10 myń fermerdi oqytyp qana qoımaı, olardy semınar barysynda qazirgi zamanǵa saı sheshimder qabyldaýǵa úıretý. Osyndaı aýqymdy baǵdarlamaǵa memleket mıllıard teńgeden astam qarajat bóldi» – dedi T.Rahymbekov.
Úkimettiń veb-saıtynyń habarlaýynsha, turaqty negizde aýyl sharýashylyǵy taýarlaryn shyǵaratyn óndirýshilerdi qoldaý jáne dáris berý úshin «Atameken» Ulttyq kásipkerler palatasy www.fermers.kz ınternet portalyn ázirleýge kirisken. Barlyq oqytý baǵdarlamalaryn onlaın túrde osy saıttan alýǵa bolady.
«Egemen-aqparat»