Máskeýde belgili keńes-orys jazýshysy jáne aqyny Fazıl Iskander uzaqqa sozylǵan naýqastan keıin 87 jasynda qaıtys boldy. Bul týraly TASS-qa jazýshy Sergeı Shargýnov habarlady.
«Klassıkterdiń qatary azaıyp barady. Ol, sóz joq, ádebıet salasy boıynsha Nobel syılyǵyn alýǵa laıyqty edi. Onda jeke tulǵa men týyndy tereńdigi de, ótkirlik pen satıra da – bári boldy. Jasynyń ulǵaıǵany men qaıratynyń kemigenine qaramastan, onyń boıynan kúnniń qýaty esip turatyn», - dedi Shargýnov.
Fazı́l Abdý́lovıch Iskandér (abhazsha - Fazıl Abdýl-ıҧa Iskander) 1929 jylǵy 6 naýryzda burynǵy Grýzııa KSR aýmaǵyndaǵy Sýhým qalasynda abhaz otbasynda dúnıege keldi. Ol osynda orys mektebin altyn medalmen bitirdi. 1954 jyly M. Gorkıı atyndaǵy Ádebıet ınstıtýtynan bilim alyp shyqty. 1957 jyly «Taý soqpaqtary» («Gornye tropy») dep atalatyn tuńǵysh jyr jınaǵy jaryq kórdi. Al 50-shi jyldardyń aıaǵynan«Iýnost» jýrnalynda jarııalana bastady.
Fazıl Iskander qalyń oqyrmanǵa 1966 jyl «Novyı mır» jýrnalynda jarııalanǵan «Taýteke shoqjuldyzy» («Sozvezdıe Kozlotýra») atty satıralyq povesi arqyly keńinen tanyldy. 1989 jyly osy hıkaıat boıynsha onymen attas fılm túsirildi.
Iskanderdiń shyǵarmashylyǵynda «Chegemnen shyqqan Sandro» («Sandro ız Chegema») degen jalpy ataýmen jarııalanǵan týyndylar sıkli erekshe oryn alady. Jazýshy ár jyldary jáne ártúrli janrlarda «Remzık», «Teńiz shaıany» («Morskoı skorpıon»), «Balalyq shaqtyń aǵashy» («Derevo detstva»), «Adamnyń turaǵy» («Stoıanka cheloveka»), «Krolıkter men aıdaharlar» («Krolıkı ı ýdavy»), «Sofıchka», «Aqyn» («Poet») jáne «Adam jáne onyń aınalasy» («Chelovek ı ego okrestnostı») degen belgili shyǵarmalaryn jazdy.
Iskander Reseıdiń «Otan aldyndaǵy qyzmeti úshin» ordeniniń II, III, IV dárejelerimen, Abhazııanyń «Ar men dańq» joǵary ordenimen nagradtalǵan. KSRO jáne Reseı memlekettik syılyqtarynyń, «Trıýmf» syılyǵynyń laýreaty.
Murat AITQOJA