Reseıdiń Novosibir oblysynyń Berdsk qalasynda jurtty qatty dúrliktirgen oqys oqıǵa oryn aldy. Oblys ortalyǵyndaǵy aýrýhanada emdelip jatqan 80 jastaǵy jalǵyzbasty zeınetker áıeldi týǵan-týystary syrtynan «jerlep» jiberip, onyń páterin satyp jiberýge áreket jasaǵan.
sib.fm portalynyń málimetinshe, zeınetker Raısa Pozdnıakova osy ýaqyttyń bárinde oblys ortalyǵyndaǵy aýrýhanada emdelip jatqan. Onyń úıinde joq ekenin aldymen kórshileri baıqaǵan. Sosyn olar páterdiń syrtqy esigin buzyp, ishke kirgen. Áıeldiń joq ekenin kórgesin, izdeý jarııalaǵan. Sol eki ortada Iskıtım aýdanynan kempirdiń týystary tabyla ketken. Olar sol aýdanda kóshede ólip jatqan bir keıýanany óz týystary esebinde jerlep, Berdsk qalasyna kelgen. Buryn zeınetker áıeldiń kórshileri eshqashan kórmegen týystary kele sala páterdi satyp, pulǵa aınaldyrýdyń jolyn qarastyrǵan. Olar úıdi úshinshi bireýdiń atyna aýdaryp ta úlgergen.
Biraq osy tusta iske prokýratýra aralasty. Buǵan aýrýynan saýyǵyp úıine qaıtqan keıýananyń dalada qalýy sebep bolǵan.
«Aqpar boıynsha, 80 jastaǵy ájeı Novosibir qalasyndaǵy aýrýhanada 4 aı ýaqytyn ótkizedi. Al úıine oralǵan kezinde, oǵan kire almaı qalady. Sebebi, ony ólip qaldy dep eseptegen týystary, ózderinshe «máıitti tanyp», páterdi úshinshi bireýdiń atyna aýdaryp jiberedi», - dedi prokýratýra ókilderi.
Qazir máseleniń mán-jaıyn prokýratýra qyzmetkerleri tekserip jatyr.
Murat AITQOJA