Oblysta birneshe vedomstvolardyń, qoǵamdyq uıymdardyń qatysýymen «Joldaǵy qabyldaý» aksııasy jarııalandy. Osy shara sheńberinde aımaqtaǵy tas joldar boıynda jumystar júrgizilýde.
Budan buryn 1 maýsymnan 15 tamyz aralyǵynda oblystaǵy avtomobıl joldaryn saqtaý maqsatymen «Nazar aýdaryńyz, aýyr salmaqty kólik!» aksııasy jarııalanyp, nátıjesinde tasymaldaýshylarǵa qatysty 116 ákimshilik is anyqtalyp, olarǵa ákimshilik hattama toltyrylǵan bolatyn. Al jyldyń birinshi jartysynda júrgizýshilerge kólik zańnamasyn buzǵany úshin 41560 063 teńgeni quraıtyn 561 ákimshilik qujat toltyrylyp, avtokóliktiń ótkeni úshin alym retinde bıýdjetke 73 mıllıon teńge túsken edi. Sondyqtan Qostanaı oblysy boıynsha kóliktik baqylaý ınspeksııasy maýsym aıynda turǵyndarǵa túsindirý jumystaryn júrgizip, jurtshylyqtyń, ásirese tasymaldaýshylardyń elimizdiń kólik zańnamasyndaǵy ózgerister men tolyqtyrýlar jóninde habarsyz ekenin anyqtaǵan bolatyn.
Búginde atalǵan aksııanyń maqsaty – tasymal isinde sybaılas jemqorlyqtyń aldyn alý, tasymaldaýshylarmen ózekti máseleler jóninde ashyq áńgime júrgizý.
Shara aıasynda oblys aýmaǵynan ótetin Qarabutaq-Komsomol-Denısov-Rýdnyı-Qostanaı jáne Qostanaı-Mamlıýtka tas joldary boıynda kólik júrgizýshilerimen áńgimeler ótkizildi. Sonymen qatar, oblystyq kóliktik baqylaý ınspeksııasynyń qyzmetkerleri azamattardyń qoǵamdyq pikirin tyńdap, olardyń ótinishteri men aryzdaryn qaraý maqsatynda senim telefondaryn da usyndy.
Názıra JÁRIMBETOVA