Qazaqstandyq belgili sport jýrnalısi Nesip Júnisbaev Halyqaralyq sport jýrnalısteri qaýymdastyǵynyń laýreaty atandy. Ol ótken ǵasyrdyń 80-shi jyly Máskeý Olımpıadalyq oıyndaryna barǵannan beri 10 Oıynnyń dýyn kóripti. Bul – árkimge berile bermeıtin baq. Búginde qazaq sportshylary álemdik bıikterdi baǵyndyryp jatsa, sol jaqsy jetistikterimizde Nesiptiń salǵan izi saırap jatyr.
Keshe Brazılııada júrip aqjoltaı habardyń kýási boldyq. Halyqaralyq sport jýrnalısteri assosıasııasy on jáne onnan kóp Olımpıada oıyndaryna baryp, sondaǵy jaǵymdy jańalyqtardy qus jolymen elge jetkizgen jýrnalısterdi arnaıy syılyqpen marapattaýdy qolǵa alǵan. Londonda bastaý alǵan osy mereıli merekede bizdiń sport salasyndaǵy metrimiz Nesip Júnisbaev laıyq dep tanylyp, Rıo-de-Janeıroda arnaıy syılyqqa ıe boldy. Tańdaýly sport jýrnalısterine beriletin bul syılyqty sport dodasyna teńeseńiz, Olımpıadalyq oıyndardyń chempıony degen eń qurmetti ataqpen saı keledi. Osy arnaýly syılyqty tabys etýge Olımpııalyq oıyndardyń 400 metrge júgirýden 5 dúrkin chempıony, álemniń birneshe dúrkin rekordshysy, amerıkalyq jelaıaq Maıkl Djonson, Brazılııa fýtbolynyń ańyz oıynshysy, komanda kapıtany, álem chempıony Kafý, ońtústikafrıkalyq golf sheberi Garrı Plaıer, ulybrıtanııalyq dańqty velotrekshi Vıktorııa Pendleton, sonymen qatar, qysqy Olımpıadalarda Monakonyń týyn úsh ret ustap shyqqan Monakonyń prınsi Albert II jáne ózgeler bar.
Marapattaý rásiminen keıin Nesip Júnisbaev tilshilerge bul syılyqtyń mańyzy týraly aıtyp berdi.
–Bul sport jýrnalısterine degen úlken qurmet! Halyqaralyq sport jýrnalısteri qaýymdastyǵy (AIPS) osymen ekinshi ret tilshilerdi osyndaı iri marapatpen qýantyp jatyr. Birinshisi London Olımpıadasynda ótken. Ekinshi ret mine, ózderińiz kórip otyrǵandaı Rıo-de-Janeıro qalasynda, taǵy da Olımpıada aıasynda uıymdastyrylyp jatyr. Bul Olımpıadada chempıon sportshylardy qalaı qurmettese, sport tilshilerin de solaı qurmetteýmen teń.
Búgingi maǵan kórsetilgen qurmet osyǵan deıin qazaq tarıhynda bolǵan joq. Mine, birinshi ret marapattalyp jatyrmyz. Bul meniń ǵana emes, qazaq eliniń, qazaq sport jýrnalıstıkasynyń jetistigi. Az-kóp bolsyn, 10 Olımpıadanyń kózin kórdim. Barǵan saıyn erteńgi urpaq úshin Olımpıadadaǵy jarqyn jetistikterimiz týraly kitaptar jazdym. Bul da bolsa eńbegimniń óteýi, – dedi Nesip Júnisbaev.
Marapattaýdan soń qazaq sportynyń ardageri óziniń on jyldyq Olımpıadalyq joldary týraly jazylǵan tórt tomdyq týyndylaryn Halyqaralyq sport jýrnalısteri qaýymdastyǵynyń mýzeıine tapsyrdy.
Baqtııar TAIJAN
Rıo-de-Janeıro