«Qazaqfılm» kınostýdııasy Ámire Qashaýbaevtyń ómir jolyna arnalǵan jańa kórkem fılmdi túsirýdi qolǵa aldy, dep habarlady Sh. Aımanov atyndaǵy «Qazaqfılm» aksıonerlik qorynyń baspasóz qyzmeti.
2017 jyly halyqaralyq prokatqa shyǵarýǵa josparlanǵan «Ámire» kınojobasy Qazaqstan men AQSh-tyń birlese otyryp shyǵaratyn alǵashqy jobasy bolmaq. Kınotýyndy qazaqtyń tuńǵysh birtýar ánshisi Ámire Qashaýbaevtyń quıryqty juldyzdaı jarq etip ótken jarqyn ómirin baıandaıdy.
1925 jyly Parıjde ótken Exposition Internationale des Arts Décoratifs et Industriels Modernes sheńberinde uıymdastyrylǵan búkilálemdik mýzykalyq baıqaýda Eýropa kórermenderine qazaqtyń dástúrli ánshilik óneri men qara dombyrasyn pash etken 36 jastaǵy Ámire Qashaýbaev KSRO delegasııasynyń arasynan top jaryp, ekinshi oryndy jáne kúmis medal ıelengen.
Fılm daryndy ánshiniń Mustafa Shoqaımen kezdesýi, djaz oryndaýshysy Djordj Gershvınmen tanysýy men ánshiniń otanyna oralǵanda bastan keshken synaqtary týraly syr shertedi.
Týyndyda Ámire Qashaýbaevtyń repertýaryndaǵy «Balqadısha», «Surjekeı», «Úsh dos», «Dýdaraı», «Jalǵyz arsha», «Bes qarager», «Aǵash aıaq» jáne «Əı-əı bópem» ánderi oryndalady.
Shilde aıynyń sońynda Latvııanyń Rıga qalasynda bastalǵan túsirý jumystary qyrkúıek aıynda Almaty qalasynda jalǵasady. Fılmniń ssenarııin jazǵan – Benjamın A. van der Vın. (Benjamin A. van der Veen).
Basty rólderdi otandyq akterler Sanjar Mádıev (Ámireni) jáne Erkebulan Daıyrov (Mustafa Shoqaıdy) somdaıdy. Sonymen qatar, brıtandyq akter Ben Aldrıdj (Ben Aldridge) jáne «Oblast tmy» fılmi arqyly tanylǵan amerıkalyq aktrısa Ebbı Kornısh syndy basqa da akterler qatysady.
Aıman MUQYShEVA