Búgin Rıo-de-Janeıroda ótip jatqan Olımpııalyq oıyndarda 69 kıloǵa deıingi salmaq dárejesi boıynsha medaldar bólisine qatysatyn qazaqstandyq aýyr atlet Jazıra Japparqul bas júldege úmitkerlerdiń biri bolyp sanalyp otyr. Onyń bul maqsatqa jete alýy múmkin be? Endi sheteldik jáne ózimizdiń sport sarapshylarynyń pikirlerine súıenip, óz oılarymyzdy tarqatyp, aıtyp kóreıik.
Bizdiń sańlaqqa bul jolda Qytaıdyń saıypqyrany Sıan Iаnmeı basty básekeles bolatyn túri bar. Jáne altyn medaldiń basty favorıti retinde de sol Aspan asty eliniń ókili atalyp otyr. Eger Jazıra ony jeńip shyǵatyn bolsa, Qytaıdyń osy kúnderi dańqtary asyp, asyqtary alshysynan túsip turǵan aýyr atletterine bir tosqaýyl qoıýmen birge, qazaq jastary arasynda sporttyń osy salasy boıynsha Olımpıadanyń chempıony atanǵan birinshi ókili bolyp shyǵa keler edi.
Jasyratyny joq, osynyń aldynda Koreıa sportshysy Re Yn Hı dopıng paıdalanǵany úshin dıskvalıfıkasııaǵa ushyraǵannan keıin Jazıranyń joly ashylyp qalǵandaı bolyp kóringen. Qazaqstandyq atlet Almatyda ótken álem chempıonatynda tap osy qarsylasyna ese jiberip, kúmis medaldi qanaǵat tutqan bolatyn. Al Hıýstonda koreı qyzy óziniń múmkindikterin barynsha jarqyratyp kórsete qoıǵan joq. Shamasy, barlyq júldegerlerdi baqylaýǵa alatyn dopıng-tekseristen saqtansa kerek. Alaıda, ol báribir tyıym salynǵan preparattardy paıdalanǵany úshin quryqqa túsip qaldy. Onymen birge reseılik Olga Afanaseva da osyndaı qaharǵa ushyrady.
Osylaısha álemniń eki birdeı myqtysy Jazıranyń basty básekelesteri sapynan shyǵyp ketti. Buǵan qosa, Reseı quramasy bul Olımpıadaǵa qatysý quqyǵynan aıryldy. Sondyqtan Japparqul týrnırde «altyn» úshin kúresýge bel baılap otyr. Munda ol bir ǵana qarsylasyna – qytaılyq Sıan Iаnmeıge qarsy áreket jasap baǵady. Qazir álemniń eki dúrkin chempıony degen ataǵy bar hanzý qyzy álemdik reıtıngte de joǵary tur. Buǵan qosa, ol Hıýstonda aldyna jan salmaı, tartysty kúreske barynsha daıyn ekenin baıqatyp ta qoıdy. Amerıka jerinde Iаnmeı qossaıysta 263 kg jınasa, Japparquldyń kórsetkishi 256 kg-dan qaıryldy. Demek, qytaılyq tuıǵyn 7 upaı alǵa ketip qaldy. Biraq onda Jazıranyń jaraqat alǵan qolymen jarysqa qatysqanyn da umytpaýymyz kerek. Olaı bolsa, Rıo jerinde eki atlettiń arasynda naǵyz keskekti kúres órbýi tıis. Munda qazaqstandyq atlettiń juldyzy joǵary bolyp shyǵýy da ǵajap emes.
Týrnırde 69 kıloǵa deıingi salmaqta synǵa túsetinder arasynan sondaı-aq kolýmbııalyq Leıdı Esenııa Solıs Arboledany atap ótýge bolady. Ol Almatyda ótken álem chempıonatynda besinshi oryn alǵan bolatyn. Sol sııaqty egıpettik Sara Samır Elsaed Mohamed Ahmed esimin de mamandar atap qoıady. Ol Hıýstonda tórtinshi bolǵan eken.
Endi ziltemirshi qyzdardyń starttyq salmaqtary týrasynda aıtar bolsaq, bulardyń arasyndaǵy tapsyrysy eń joǵary bolyp turǵany - Jazıra Japparqul. Ol jarysty bárinen de aýyr salmaqpen bastaǵaly tur. Osyǵan oraı bizdiń qyzdyń múmkindigi de joǵary bolmaq.
Oıyndarda áıelderdiń 69 kg salmaqtaǵy saıysy 00:30 saǵatta bastalady. Ol «Qazaqstan» telearnasynan tikeleı efırde kórsetiledi.
Damır QOJAMQUL