Aqyn syıǵa tartqan kitaphana

Zaısan aýdany turǵyndarynyń súıikti ornyna aınaldy «Kitap – bilim bulaǵy» dep qalaı oryndy aıtylǵan. Osy­dan 50 jyldaı buryn bilim ordasynyń qara shańyraǵy  QazMÝ-diń jýrnalıstıka fakýl­tetine oqýǵa túske­nimizde ustazymyz, Keńes Odaǵy­nyń Ba­tyry Málik Ǵabdýllınnen dá­ris alǵanymyz bar. Keń-baıtaq eli­mizdiń túkpir-túkpirinen jınal­ǵan qa­ra domalaqtardyń bilimi men ili­mine kóńili tolmaǵan akademık aǵamyz «Oý aınalaıyndar-aý, erteń dıplom alǵan soń jýrnalıst bolasyńdar, al bul mamandyq tereń bilim men bilik­tilikti qajet etedi, endeshe, ýaqyt­taryńdy bos jibermeı, gazet-jýrnal, kitap oqyńdar, al kitap degenimiz rýhanı azyq, sanany silkintedi, bilimdi bolasyńdar deýshi edi. Son­dyqtar bolar, sol kezdegi stýdent­ter kitaphanadan shyqpaıtyn, jańa shyǵarmalardy izdep júrip oqıtyn. Al qazirgi jastar she? Bul saýaldy jaqynda Zaısan aýdanyndaǵy ortalyq kitaphanada bolǵanymyzda, mekeme  dırektory Raısa Samarhanovaǵa qoıǵan edik. – Qazir eresekter de, jastar da kitaphanaǵa jıi keledi. Aýdannyń barlyq eldi mekenderinde, ıaǵ­nı, segiz aýyldyq okrýgte kitap­­­hanalar jumys istep tur. Aýdan boıynsha kitap qory 105 myń dana, al bizde 46700 kitap bar. Oblystyq Pýshkın atyn­daǵy kitaphananyń dırektory, «Qurmet» ordeniniń ıegeri Habıba  Aqjigitova bizge únemi qolǵabys jasap turady, 2012 jyldan beri sol kisiniń qamqor­lyǵy nátıjesinde «Ir­bıs» baǵdarlamasy  boıynsha elektrondy katalogqa  kitap tizimi engizildi, kelip kitap oqımyn degen oqyrmandar qajetti oqýlyqtar men kórkem shyǵarmalardy tez taý­yp alyp jatady. Birikken Ulttar Uıymynyń «Damý» baǵdarlamasy boıynsha ekrandy 3 beıneproektor satyp áperdi. Qazir memlekettik qyzmetkerler jáne joǵary mektep oqýshylary test tapsyramyn dese, bizde bilim sapasyn teksere alady. Aýdandyq kitaphanada jáne Qarataldaǵy kitaphanada on-laın kestesi boıynsha qyzmet kórsetýde. Bul kúnderi tek Zaısan qalasy boıynsha 4 300 eresekter, bir jarym myń oqýshylar kitaphana qyzmetin paıdalanýda, – dedi kitaphana dırektory. Kitaphanany araladyq.  Só­re­lerdegi kitaptar uqyppen jı­nalǵan, tazalyq baıqalady. Munda qazir 7 kitaphanashy qyzmet etedi. Jalaqylary bıyldan bastap 40 paıyzǵa ósken. Bir buryshta «Zaısan aýdanynyń qurmetti azamaty, Qazaqstan Jazý­shylar odaǵynyń múshesi Áýbákir Das­tan­uly Nilibaev óziniń týǵan ólkesine jeke kitap­tar qoryn syıǵa tartty» degen jazý kóz tartady. Almatylyq qalamgerler Áý­bákir aǵamyzdyń kitap qory­nyń moldyǵy jaıly jyr qylyp aıtatynyn  san márte estigenbiz. Osydan alty jyl buryn qalamger aǵamyz Zaısanǵa kelgen saparynda aqynnan jeke kitaphanańyzda qansha kitap bar dep suraǵanymyzda, saqtyq jasap, shynyn aıtpaǵan, Almatyda menen kitap qory kóp bir-eki adam ǵana bar dep jymıǵan. О́ziniń seksennen asqan ǵumyrynda  baılyq emes, kitap jınaǵan Áýbákir Das­tanuly sońǵy ret kindik qany tamǵan ólkesine kelgende jeke kitap qorynan 400 kitapty syı­ǵa tartypty. Kitap bolǵanda qandaı, qolǵa túse bermeıtin shet­eldik klassıkterdiń, atap aıt­qanda, Fırdoýsı, Naýaı, Alek­sandr Bloktyń sırek kez­desetin jyrlary, Tagordyń bir­neshe tomdary endi Zaısan aýdany turǵyndarynyń ıgiligine arnal­ǵan. Qazaqtyń belgili aqyny, Úndistannyń Tagor atyndaǵy halyqaralyq syılyǵynyń laýrea­ty Nilibaev aǵamyzdyń ónegeli isin basqalar jalǵastyryp jatsa, qanekı, deımiz de. El Táýelsizdiginiń 25 jyldyǵy qarsańynda aýdandyq kitaphana taǵy bir ıgilikti sharany qolǵa alypty. Kitaphana qyzmetkerleri aýyldardy aralap, jerles jazýshylar shyǵarmalarynyń kórmesin ótkize bastaǵan. Ja­qynda Úlken Qaratal aýylynda Uly Otan soǵy­synyń ardageri, ustaz Orazbaı Turǵanbaıuly atyndaǵy saıabaqtyń saltanatty ashylýynda kitaphana dırektory Raısa Samarhanova jerles aqyn-jazýshylardyń kitap kórmesin uıymdastyrdy. Adam­­darǵa jan shýaǵyn syılaǵan ki­taphana qyzmetkerleriniń isine sáttilik tileımiz. Ońdasyn ELÝBAI, jýrnalıst Shyǵys Qazaqstan oblysy, Zaısan aýdany Sýretti túsirgen avtor