Memleket basshysy Rıo-de-Janeırodaǵy Olımpıada oıyndaryndaǵy jeńisterine baılanysty Nıdjat Ragımov pen Dmıtrıı Balandınge quttyqtaý jedelhattaryn joldady
Akorda.kz-tiń habarlaýynsha, Qazaqstan Prezıdenti aýyr atletıka saıysynda altyn medal ıelengen Nıdjat Ragımovty quttyqtady.
«Qazaqstandyqtar seniń ónerińdi zor qyzyǵýshylyqpen jáne úlken úmitpen tamashalady. Sen olardyń úmitin tolyq aqtadyń. Joǵary sporttyq sheberligiń, jankeshtiligiń men asqan erik-jigeriń saǵan qıyn saıysta myqty qarsylastardy jeńip shyǵyp, Qazaqstannyń olımpııalyq komandasyna alǵashqy altyn medaldi áperýge kómektesti. Seniń jeńisiń eldiń jas sportshylary úshin laıyqty úlgi bolary anyq», – delingen jedelhatta.
Nursultan Nazarbaev sportshyǵa jańa jeńis pen jetistikter tiledi.
Sonymen qatar, Memleket basshysy Dmıtrıı Balandındi sýǵa júzý saıystarynda jeńip alǵan altyn medalimen quttyqtady.
«Seniń jarqyn jeńisiń qazaqstandyqtarǵa zor qýanysh syılady. Dańqty qarsylastarmen jankeshti jáne qıyn saıysta jeńip alǵan altyn medal – seniń joǵary sheberligińniń, maqsatqa talpynýyńnyń, erik kúshiń men qaırat-jigerińniń kórsetkishi. Seniń teńdessiz tabysyń Qazaqstan sportynyń shejiresinde máńgilik qalady», – delingen jedelhatta.
Qazaqstan Prezıdenti sportshynyń keleshekte jańa belesterdi baǵyndyrýyna tilektestik bildirdi.
Aıdar О́RISBAEV