Aımaqta óńiraralyq kooperasııany damytý jónindegi sharalar Memleket basshysynyń tapsyrmasy boıynsha 2016 jyldyń basynan beri júrgizilip keledi. Oblys ákimdigi jyl basynan beri Qyzylorda, Jambyl jáne Ońtústik Qazaqstan oblystarymen ózara yntymaqtastyqty nyǵaıtý, óńiraralyq baılanysty keńeıtý týraly memorandýmdarǵa qol qoıdy. О́zara tıimdi taýarlar jetkizý men tájirıbe almasý jumystary elimizdiń ózge oblystarymen de júrip jatyr.
О́ńiraralyq kooperasııa júzege asyryla bastaǵaly jaqsy kórsetkishterge qol jetkizildi, áleýmettik mańyzdy azyq-túlik túrlerin tikeleı jetkizýdiń arqasynda baǵa ortasha 10-15 paıyzǵa, jekelegen ónimderge 40 paıyzǵa deıin tómendedi. Alaıda, qazirgi tańda jergilikti taýar óndirýshilerge jáne azyq-túlik pen ózge taýar túrlerine baǵany tómendetý úshin qoldaý kórsetýge baǵyttalǵan jobalardy júzege asyrý qarqyny báseńdegen. О́ńirde aýdanaralyq kooperasııany damytý da ózekti bolyp qalýda. Qazirgi tańda bul baǵytta tek Shalqar jáne Yrǵyz aýdandary boıynsha alǵa jyljý bar, sonymen birge, kórshiles Qyzylorda oblysynyń Aral jáne Qazaly aýdandarymen iskerlik baılanys ornatylýda. Yrǵyz aýdanynda balyq zaýyty qurylysyna qyzylordalyq kásipker qarjy quıdy.
О́ńiraralyq kooperasııany damytý jumystarynyń qarqyny nashar. Áli de kórshi oblystardyń áleýeti tolyq paıdalanylmaı otyr. Sonymen birge, tek azyq-túlik jetkizý boıynsha jumystar jasalýda, óńiraralyq kooperasııa ekonomıkanyń ózge salalaryna oń yqpalyn tıgize almaýda. Munyń barlyǵy júıeli jumystyń bolmaýynan qalyptasyp otyrǵan jaǵdaı. Jaýapty tulǵalardyń tarapynan baqylaý men jumystardy úılestirý tıisti deńgeıde emes. О́ńiraralyq baılanystardy damytýdyń eń aldymen turǵyndar úshin, sonymen birge ımport almastyrý turǵysynan alǵanda óńir úshin tıimdi ekenin ómirdiń ózi kórsetip otyr. Ákimdikter men memlekettik organ jetekshilerine óńiraralyq kooperasııa úlgisin odan ári damytyp, ónerkásip, qurylys, bilim, mádenıet, sport, týrızm jáne basqa salalarda keńeıtýge baǵyt ustasa utymdy bolary sózsiz.
Satybaldy SÁÝIRBAI,
«Egemen Qazaqstan»
Aqtóbe oblysy