Dástúrli «Mektepke jol» aksııasy Jetisý jerinde de bastalyp ketti. Sebebi, búldirshinderdiń biri bilim ordasynyń tabaldyryǵyn attaýǵa asyqsa, biri kúnkóris qamy úshin bazar jaǵalap, taǵy biri – alqaptarda júr. Ata-anamyzda bar eken dep zamanaýı quraldardan bas kótermeıtini óz aldyna. Áıteýir, búginde áleýmettik teńsizdik etek jaıyp bara jatqany anyq. Solaı eken dep bılik qol qýsyryp qarap otyrǵan joq. Almaty oblystyq ákimdiginde Elbasynyń oqýshylardyń mektepke tolyq barýyn qamtamasyz etý týraly tapsyrmasyna sáıkes, taqyryp aıasynda jıyn boldy. Ony Almaty oblysy ákiminiń orynbasary Baqtııar О́nerbaev ashyp, júrgizip otyrdy.
«Aǵymdaǵy jyldyń 1 tamyz-30 qyrkúıek aralyǵynda «Mektepke jol» dástúrli respýblıkalyq qaıyrymdylyq aksııasy Táýelsizdiktiń 25 jyldyǵyna oraı «Baqytty balalyq shaq mekeni» uranymen Jetisý jerinde de bastalyp, qanatyn jaıdy. Aksııanyń maqsaty – kóp balaly otbasynan shyqqan oqýshylarǵa, jetim balalarǵa, ata-ana qamqorlyǵynsyz qalǵan balalarǵa qoldaý kórsetý jáne túrli áleýmettik sebepter boıynsha mektepke balalardyń bara almaýynyń aldyn alý. 2015-2016 oqý jylynda 51 237 balaǵa 427 mln. 500 myń teńge kóleminde kómek kórsetilgen edi. Sonyń ishinde 46 392 balaǵa 375 mln. 8 myń teńgege demeýshiler oqý quraldary men mektep formalaryn satyp alyp bergen bolatyn. Al aǵymdaǵy jyly jalpy 55 myń balaǵa kómek kórsetileıin dep otyr. Negizi, bıyl da oblys ákimi Amandyq Batalovtyń «Mektepke jol» aksııasyn ótkizý týraly arnaıy ókimi shyqty», dedi óńir basshysynyń orynbasary.
Bul kúnderi bilim berý salasy men ishki ister organy qyzmetkerleri jáne erikti ata-analar birlese túngi klýbtar men sharýa qojalyqtarynyń alqaptaryn, saıajaılardy aralap oqýshylardyń oqýdan keshikpeýine yqpal etýde. Ras, qalamyn, kitap-dápterin, tipti kompıýterin daıyndap otyrǵan balalar jeterlik. Bul oqýǵa degen yntany, uqyptylyqty, alǵa umtylýshylyqty bildiretin faktor. Áıtkenimen, sanany bıleıtin ózge de jaıttardy jasyra almaımyz. Deı otyryp, Bilim kúni jaqyndaǵanda baıbalam salǵannan esh nárse ózgermeıtinin qaıta bıliktiń jaılap bolsa da ıgi qadam jasaǵanyn qoldaý qajet. Quptarlyǵy sol – balalardyń quqyqtaryn qorǵaý, ishki ister, eńbek jáne halyqty áleýmettik qorǵaý organdarymen, kent, aýyl ákimderimen, jastar, balalar jáne úkimettik emes uıymdarmen, ata-analarmen birlese otyryp, ár eldi mekende qıyn balalar tobyna jatatyn, onyń ishinde qaraýsyz, qadaǵalaýsyz qalǵan jáne jaǵdaıy joq otbasylar men mıgranttar balalaryn, sondaı-aq ózge de sebeptermen júıeli túrde sabaqqa barmaıtyndardy anyqtaý úshin reıdterdi júrgizilýde. Ekinshiden, aksııanyń basynda jáne sońynda «Balalardy mektepke jınaýǵa kómektes», «Oqýshyǵa mektepke barar joldy tabýǵa kómektes», «Barlyq balalar mektepte oqýǵa tıis», «Men mektepti tańdaımyn» degen shara aıasynda qaıyrymdylyq kórsetýshiler nemese mesenattar festıvali uıymdastyratynyn bılik aıtyp otyr. Úshinshiden, aksııa qorytyndylary aýdan, qala ákimdigi janyndaǵy kámeletke tolmaǵandardyń isteri jónindegi vedomstvoaralyq komıssııanyń otyrystarynda qaralatyny da kóp jaıdy ańǵartady.
Nurbol ÁLDIBAEV,
«Egemen Qazaqstan»
TALDYQORǴAN