Eýrazııalyq ekonomıkalyq odaqtyń Úkimetaralyq keńesiniń otyrysyna qatysý úshin Reseıdiń Sochı qalasyna barǵan Qazaqstan Premer-Mınıstri Kárim Másimov keshe Reseı Úkimetiniń Tóraǵasy Dmıtrıı Medvedevpen kezdesti.
Osy saparynyń aldynda K.Másimov reseılik áriptesimen kezdesýde Qazaqstandaǵy jurtshylyqty kópten mazalap júrgen mańyzdy másele – Kenesary han men Keıki batyrdyń bastaryn elge qaıtarý jaıyn qozǵaıtynyn habarlaǵan edi. Premer-Mınıstr aıtqanynda turdy. Reseı Úkimetiniń Tóraǵasy bul máseleni anyqtap, ótinishti oryndaý úshin qajetti tapsyrmalar beretinin aıtty.
«Men aýyzsha jáne eger qajet bolsa, jazbasha tapsyrma berip, bul máseleniń anyq-qanyǵyn anyqtaımyn», – dedi D.Medvedev.
Kezdesý barysynda, sondaı-aq, Astanada ótetin XIII О́ńiraralyq yntymaqtastyq forýmyna qatysty máseleler de talqylandy. Atap aıtqanda, Batys Eýropa – Batys Qytaı sekildi iri kólik jobalaryn júzege asyrý barysy sóz boldy. Jaıyq transshekaralyq ózenine qatysty taqyrypqa basa nazar aýdaryldy. Qazaqstan Premer-Mınıstri bul másele jóninde úkimetaralyq kelisimge qol qoıýdy usyndy.
Sonymen qatar, logıstıka, shekara mańy yntymaqtastyǵy jáne naqty ekonomıka salasyndaǵy basqa da mańyzdy máseleler talqyǵa salyndy.
«Egemen-aqparat»