Bıyl IýNESKO kóleminde Alash qaıratkeri Álıhan Bókeıhannyń 150 jyldyǵy atalyp ótilýde. Soǵan oraı bıiktigi 13 metr bolatyn eskertkish jospar boıynsha, Ertistiń sol jaǵalaýynda oryn teppek. Bul jóninde Semeı qalasy ákiminiń orynbasary Nadejda Sharova áńgimelep berdi.
– Eskertkishti bıyl ornatýdy kózdep otyrmyz. Keler jyly Alashorda qozǵalysyna 100 jyl tolatyndyǵy belgili. Sondyqtan, osy mereıtoıǵa oraı eskertkishti úlken keshenge aınaldyrý josparlanǵan. О́ıtkeni, Álıhan Bókeıhan men Alashordany bólip qaraýǵa bolmaıdy.
Ákim orynbasarynyń aıtýynsha, aldaǵy jyldary boı kóteretin keshen men onyń mańyn abattandyrý, kórkeıtý jumystary qolǵa alynbaq. Sáýlet nysanyna aparar joldar men jaryqtandyrý máseleleri de sheshilmek.
Eskertkish úshin bıýdjetten 24 mln. teńge qarjy qarastyrylǵan. Eskertkish eskızine jarııalanǵan respýblıkalyq baıqaý bıyl 22 sáýir men 23 mamyr aralyǵynda ótken bolatyn. Basqosýda aıtylǵandaı, oǵan 4 músinshi 5 eskız usynǵan. Nátıjesinde, belgili ǵalymdar, tarıhshylar men sáýletshilerden quralǵan sarapshy top belgili músinshi, Qazaqstan Sýretshiler odaǵynyń múshesi Baqytbek Muhametjanovtyń eńbegine tańdaý jasapty. Degenmen, tarıhı derekter men sol zamanǵy erekshelikterdi eskerý mańyzdy. Máselen, baıqaýda jeńip shyqqan nobaıda Alash qaıratkeriniń qolynda asyq bar. Iаǵnı, ázirshe qaǵazdaǵy eskız áli de ózgeriske ushyraýy múmkin. Qazaqstan halqy Assambleıasynyń múshesi Oral Sháripbaev bul asyq týraly bylaı dedi:
– Qoǵam qalaı qabyldaıdy, halyq burys túsinip qalmas úshin, bizdiń de bir oıymyz bar, asyqtyń ornyna qaýyrsyn-qalam, kitap ustasa jaqsy bolar edi. Sebebi, bul tuǵyry bıik tulǵanyń oı-tilegi – qazaq memleketin qurý bolǵany belgili. Sondyqtan, eskertkishtiń maǵynasy búgingi táýelsizdikke saı bolýy tıis.
Raýshan NUǴMANBEKOVA
SEMEI