el bolashaǵy úshin mańyzdy
Bilim jáne ǵylym mınıstrliginiń tapsyrysy boıynsha aǵymdaǵy jyldyń ekinshi toqsanynda «Jastar» ǵylymı-zertteý ortalyǵy «Jastar arasyndaǵy salamatty ómir saltyn qalyptastyrý» taqyrybynda elimizdiń jastary arasynda áleýmettik saýalnama júrgizdi. Saýalnamaǵa Qazaqstan boıynsha 14 jastan 29 jasqa deıingi aralyqtaǵy 2000 respondent qatysty. Bir apta ishinde saýalnamaǵa qatysqan 14 jastan 18 jas aralyǵyndaǵy jastardyń 85%-y deneshynyqtyrýmen aınalysqandyqtary anyqtaldy. Al 24 jastan 29 jasqa deıingi aralyqtaǵy jastardyń 71%-y sportpen shuǵyldanady. Mádenıet jáne sport mınıstrliginiń derekteri boıynsha, sportpen shuǵyldanatyn jastar sanynyń kórsetkishi jyl saıyn artýda. Mysalǵa, 2014 jyly 2012 jylmen salystyrǵanda deneshynyqtyrýmen aınalysatyn adamdardyń sany 3,5%-ǵa nemese 0,7 mıllıon adamǵa artqan. Búginde mektep jasyndaǵy balalardyń 90%-na jalpy bilim beretin mektepterdiń sport zaldarynda deneshynyqtyrýmen jyl boıyna aınalysýlaryna múmkindik jasalǵan, 26%-na qysqy sport túrlerimen aınalysýǵa jaǵdaı jasalǵan. 125 joǵary oqý ornynda 113 sport klýby men shamamen 2 myń seksııa qyzmet kórsetedi. Elimizdiń deneshynyqtyrý men sport salasy jastardyń salamatty ómir saltyn ustanyp, fızıkalyq belsendilikterin arttyrýǵa baǵyttalǵan. Arnaıy jastar úshin sport ortalyqtaryna barýǵa jeńildikter qarastyrylǵan, jyl saıyn 40 halyqaralyq jáne respýblıkalyq sharalar ótkiziledi, sonymen qatar, sport ınfraqurylymy da ekpindep damýda. Qazaqstandaǵy sport mádenıetiniń damýynyń bir dáleli retinde elimiz sportshylarynyń Rıoda kórsetip jatqan tamasha ónerlerin aıtýǵa bolady.
Nurgúl NURMAǴAMBET,
«Jastar» ǵylymı-zertteý
ortalyǵynyń sarapshysy