Qaıyrymdylyq – asyl qasıet

«Jaqsynyń jaqsylyǵyn aıt, nury tasysyn!»  demekshi, qaıyrymdylyq pen meıirimdilikti nasıhat­taıtyn jobalar barshylyq. Máselen,  «Altyn júrek» – qaıyrymdylyq jolyndaǵy eń bedeldi marapat. Araǵa 10 jyl ýaqyt salsa da qoǵamda óz mánin joǵaltpaǵan joba, búginde el nazarynda. Marapat ıegerleri – ártister men kásipkerler, iri kompanııalar, BAQ pen qarapaıym turǵyndar. Eń bastysy, joba muqtaj jandarǵa kómek qolyn sozýǵa degen talpynysty shyńdaıdy. Sońǵy ýaqytta zaman aǵymy ma, álde adam peıili me, adam­ger­shi­lik júregimizden joǵalyp bara jatqan sııaqty. Onyń ornyna kún­de­likti kúıbeń tirshilik, ózim­shildik, sanasý sııaqty qasıetter be­leń alýda. Árıne, kópke topy­raq shashý orynsyz. Izgi tilekteri men nıetterin bildiretin adamdar kóbine ózderi jaıly dúıim jurtqa pash etýden aýlaq. Sondyqtan bolar, olar jaıly bireý bilse, bireý bilmeıdi. Joba demeýshileri meshitter men shirkeýlerdiń qurylysyna, jetim­der men múgedekterge materıal­­­dyq kómek berý maqsatyn­da qol ushyn sozady. Son­daı-aq, jarymjan jan­dar men jar­shy­sy joq jas ta­lant­tardyń óner jolyna batyl qadam basý­laryna járdemdesedi. «Baýyrjan» qoǵamdyq qory­nyń qyzmetkerleri osy­dan bir­ne­she jyl buryn el qalaýly­laryn barsha jurt tanýy qajet degen sheshimge keldi. Uıym belsen­di­leri osylaı «Altyn júrek» syılyǵyn dúnıege ákeldi. Bul arnaýly marapatty jeke tulǵalarmen qatar birqatar tutas kompanııalar da ıelene alady. Atap ótý kerek, joba halyq ara­synda birden nazarǵa ilikti. Alǵashqy jyldan-aq uıym­das­tyrý­shy­lar 70 ótinish jınasa, osy kúni olar­dyń sany 200-ge deıin jetip otyr. Atalymdar legi biraz ýa­qyt­qa deıin ózgerissiz boldy. 10 bólimi boıynsha 2011 jyldan beri sheteldik azamattarǵa da qatysýǵa múmkindik týdy. Endi «Qazaqstannyń damýyna zor úles qosqany úshin» taıaý jáne alys shetel kóshbasshylary baq syna­sady. «Jetim balalarǵa kómek» ata­­lymy aıasynda BI Group qurylys hol­dınginiń basshysy Aıdyn Rahym­baev, 350 bala tárbıelep otyrǵan Talǵar qalasynyń tur­ǵy­ny Tuıaq Esqojına, «Aqnıet» balalar ot­basylyq úıiniń negizin salýshy Esirkep Esimhanov «Altyn júrek» syılyǵynyń laýreattary atandy. 2011 jyly «Jyl qaıyrym­dysy» atalymy boıynsha Qalısha Túresbekova esimdi zeı­netker apa marapattalǵan bolatyn. Bul keremet jannyń 1959 jyldan bastap donor bolyp kele jatqanyn eskersek, kez kelgen ýaqytta ol óz qanymen bólisýge asyǵady. Elý jyldan beri Qalısha apaı óziniń ıgi isi úshin eshkimnen alǵys almaǵan. Mundaı qadamdy ol boryshym dep sanasa kerek. Osyndaı qaıy­rym­dylyq jolyndaǵy márttikke tamsanbaý múmkin emes. Kásipker О́rken Eseı mereıli júldegerler qatarynda. Ol óz qarajatyna bir aýylǵa iri sporttyq keshen salypty. Sondaı-aq, meshit qurylysyna 1,5 mln. teńge jumsaǵan. Ulttyq syılyq qaıyrymdy­lyq uıymdardyń jetekshilerin de nazardan tys qaldyrǵan emes. Qoǵamdyq belsendi qaırat­ker Arýjan Saın múgedekterge jasaǵan qaıyrymdylyǵy úshin «Altyn júrek» atalymy boıynsha arnaıy marapatqa ıe boldy. 10 jyl ishinde «DOM» qoǵamdyq qory 1380-nen astam qazaqstandyq balaǵa kómek qolyn usynǵan. 2014 jyldyń laýreaty, ARDI uıymynyń jetekshisi, Ásııa Ahtanova «Múgedekterge kómek» atalymyna ilikti. Uıymdaǵy 24 jyldyq eren eń­beginiń arqasynda ol 1000-ǵa jýyq jetkinshekke járdemdesti. Uıymnyń birqatar jobalarynyń negizinde, osy kúni assosıasııa 537 múmkindigi shekteýli bala tárbıeleıtin otbasylaryna, 147 múgedekter arbasyna tańylǵan balalarǵa kómektesip keledi. «Altyn júrek» tuǵyrynda Qazaqstannyń birqatar korpora­sııalary da bar. 2015 jyly, tany­mal fermer, Aqmola oblysyn­daǵy «Rodına» agrofırmasynyń basshysy, «Altyn júrek»-2015 syılyǵynyń laýreaty Ivan Saýer óz ólkesiniń damýyna zor úles qosty. Kompanııa óz qara­ja­tynan 314 mıllıon teńge bólip, onyń biraz bóligin balalarǵa ar­nalǵan oıyn alańdarynyń qu­ry­lysy men mektepterdegi oqý­shylardyń kúndelikti tamaǵyna jumsaǵan. Uıymdastyrý komıtetiniń saraptamasy boıynsha, «Altyn júrek» syılyǵynyń 10 jyldyq tarıhynda jobaǵa atsalysqan úmitkerler men laýreattardyń arqasynda 80 mıllıard teńgeden astam qarjyǵa qaıyrymdy­lyq sharalary jasalǵan. Joba qataryn­daǵy asyl jandardyń bel­sen­dilikterin izgiliktiń anyq kóri­ni­sin baıqatý dep bilemiz. Gúlzat SAHOVA, «Baýyrjan» qaıyrymdylyq qorynyń úılestirýshisi