Memlekettiń negizgi kapıtaly – halyq. Sondyqtan, adam densaýlyǵy – eń negizgi máseleniń biri. Densaýlyq saqtaý salasyna qarjynyń jetkilikti bólinýi, jańa quraldarmen jabdyqtalýy, mamandardyń biliktiligin arttyrý sekildi irgeli jumystyń barlyǵy memlekettiń negizgi baılyǵyna quıylǵan ınvestısııa dep bilýimiz kerek.
Táýelsizdiktiń alǵashqy jyldarynan bastap Qyzylorda oblysynyń densaýlyq saqtaý salasynda qyrýar tirlik atqaryldy. Ekologııalyq aımaq sanalatyn óńirde turatyn halyqtyń densaýlyǵyna myqtap kóńil bólmese bolmaıtyny beseneden belgili ǵoı. Sol sebepti atalmysh sala basty nazarda boldy. Degenmen, Baıqońyr qalasy men Aqaı, Tóretam eldi mekenderindegi aýrýhananyń máselesi talaı jyldan beri sóz bolyp kele jatyr edi. Burnaǵy kúni bul másele de sheshimin tapty. Solaısha, Baıqońyr qalasynda oblystyq medısınalyq ortalyqtyń fılıaly ashyldy. Bul ortalyqta Baıqońyr qalasynda turatyn Qazaqstan azamattary men Qarmaqshy, Qazaly jáne Aral aýdandarynyń turǵyndary medısınalyq kómek ala alady.
2007 jyly Qazaqstan men Reseı arasyndaǵy kelisim negizinde Baıqońyr qalasynda 80 tósektik perzenthana, Qazaqstan Respýblıkasynyń qarajaty esebinen aýysymyna 100 kelýshige arnalǵan áıelderge keńes berý ortalyǵyn salý týraly sheshim qabyldanǵan bolatyn. Ortalyq ǵımaratynyń qurylysyna 1 mıllıard teńgeden astam qarajat jumsalǵan. Qurylys jumystary 2010 jyldyń aıaǵynda aıaqtalyp, ártúrli sebeptermen nysannyń ashylýy keıinge qaldyrylyp keldi. Tek 2015 jyldyń qarashasynda Qyzylorda oblysy ákimdiginiń bastamasymen Máskeýde ótken úkimetaralyq komıssııa otyrysynda atalmysh ǵımaratty Qazaqstan tarapyna berý týraly sheshim qabyldanyp, aýrýhanany jabdyqtaý úshin qosymsha qarajat bólindi.
Oblystyq medısınalyq ortalyq fılıalynyń ashylý saltanatyna aımaq basshysy Qyrymbek Kósherbaev, «Jerústi ǵarysh ınfraqurylymyn paıdalaný» ortalyǵy bas dırektorynyń mindetin atqarýshy Ranohon Djýraeva qatysyp, Baıqońyr qalasy turǵyndarynyń qýanyshyna ortaqtasty.
– Oblystyq medısınalyq ortalyq fılıalynyń ashylýy – Baıqońyr qalasynda turatyn qazaqstandyqtar úshin úlken qýanysh. Táýelsizdiktiń 25 jylynda oblysta 3 medısınalyq ortalyq paıdalanýǵa berildi. Olar: oblystyq medısınalyq, dıagnostıkalyq jáne perınataldyq ortalyqtar. Sonymen qatar, 5 aýdandyq emhana, bir aýrýhana, 4 týberkýlezge qarsy dıspanser, Qyzylorda qalasynan zamanaýı emhana jáne óńirdiń barlyq eldi mekenderinen jalpy sany 100-ge jýyq emdeý mekemesi el ıgiligine paıdalanýǵa berildi. Olardyń barlyǵy avtokólikpen, qajetti medısınalyq qural-jabdyqtarmen qamtamasyz etilgen. Sonymen birge, joǵary mamandandyrylǵan kardıologııalyq jáne neıroınsýlttik ortalyqtar ashyldy. Nátıjesinde respýblıkanyń basqa qalalaryna baryp emdeletin qyzylordalyqtar sany 3 esege azaıdy,– dedi Qyrymbek Eleýuly.
Baıqońyr qalasynda jańadan ashylǵan medısınalyq ortalyq 240 myń halqy bar Qarmaqshy, Qazaly men Aral aýdandarynyń turǵyndary úshin de medısınalyq kómek kórsetetin bolady. Medısınalyq kómek soltústik aýdandardyń turǵyndary oblys ortalyǵyna baryp em alatyn basty baǵyttar boıynsha júrgiziledi. Qazirdiń ózinde Baıqońyrdaǵy oblystyq medısınalyq ortalyq fılıalynda ońaltý jáne terapııa bólimsheleri jumys istep tur. Kezeń-kezeńimen oftalmologııa, lor, hırýrgııalyq, gınekologııalyq bólimsheler men perzenthana jumysyn bastaıdy dep kútilýde.
Erjan BAITILES,
«Egemen Qazaqstan»
Qyzylorda oblysy