Qazaqstan boks federasııasy Rıo-de-Janeıro Olımpııalyq oıyndaryndaǵy bokstan 91 kıloǵa deıingi salmaqta qazaqstandyq Vasılıı Levıt pen reseılik Evgenıı Tıshenko arasynda ótken fınaldyq jekpe-jegindegi tóreshilikke qatysty óz pozısııasyn túsindirip berdi.
Eske sala keteıik, keshe, 15 tamyz kúni tań aldynda oınalǵan bul shaıqasta tóreshiler jeńisti 3:0 (29:28, 29:28, 29:28) degen eseppen bir aýyzdan Evgenıı Tıshenkoǵa berip jibergen. Osyǵan oraı Oıyndardyń altyn medalin reseılik boksshy alyp, qazaqstandyq atletke kúmis júlde buıyrǵan edi. Biraq tóreshilerdiń sheshimi habarlanǵan kezde zaldaǵy kórermenderdiń kópshiligi buǵan narazylyq bildirip, ysqyrǵan bolatyn.
«Barlyq qazaqstandyqtar sııaqty biz de Vasılıı Levıttiń fınaldyq urysyn qarap otyrmyz. Biz Vasılıı Levıt utty dep oıladyq. Biraq tóreshilerdiń sheshimi basqasha bolyp shyqty. AIBA prezıdenti Chıng-Kýo Vý aıtqandaı, qandaı bolǵanda da tóreshilerdiń sheshimin qurmetteý kerek. AIBA erejesi boıynsha, tóreshilerdiń sheshimine narazylyq berilmeıdi, sondyqtan biz narazylyq bermeımiz», - dedi Qazaqstan boks federesııasy tóreshiler komıssııasynyń tóraǵasy Aslan Igýbaev.
Ol sondaı-aq Qazaqstan boks federasııasynyń barlyq ulttyq federasııalardyń basshysy bolyp tabylatyn AIBA (Halyqaralyq áýesqoı boks assosıasııasy) júıesine kiretinin atap ótti.
«Biz óz basymyzdan ózimiz joǵary sekire almaımyz. Erteń bizge kelesi Olımpıada, álem jáne Azııa chempıonattary kezinde olarmen jumys jasasýǵa týra keledi. Sondyqtan biz AIBA-nyń saıasatyn ustanýǵa tıispiz», - dep sózin túıindedi Igýbaev.
Al bokstan Qazaqstan qurama komandasynyń bas jattyqtyrýshysy Myrzaǵalı Aıtjanov jýrnalısterge bergen suhbatynda AIBA-nyń bárin eseppen jasap otyrǵanyn, sonyń qabatynda Qazaqstan boksshylary ádiletsiz tóreshilerdiń qurbandary bolyp jatqandaryn aıtty.
Osy tusta bloger Ǵalym Baıtoq barlyq qazaqstandyqtardy Vasılıı Levıtke altyn medal jasap berý úshin qarjy jınastyrýǵa shaqyryp otyr.
Damır QOJAMQUL
Foto: Danııar MAILYBAEV