Oljaly onynshy kún

DÚBIR

Biz jarystyń onynshy kúni qolda turǵan úsh medaldan qaǵylyp qaldyq. Sonyń biri «altyn» edi, aǵaıyn... Saıystyń bul kúni jaqsy bastalǵan. Kópten beri kóńilimizdi kúpti qylyp júrgen baıdarka jáne kanoemen esýshilerimizdiń ekeýi fınalǵa ótti. Áýeli 500 metrlik jarysta baıdarkamen juptyq esýde Natalıa Sergeeva men Irı­na Podoınıkova aqtyq synǵa jol­dama aldy. Keıin baıdarkamen jeke esýde Inna Klınova 200 metr qashyqtyqta 40,381sekýnd­ta óz tobynda úshtikke kirip, fı­nalǵa ótti. «Fınal» dep aýzy­myzdy qompaıtqanymyzben, bul áli tolyq medal emes. Endi olar kelesi kúni óz tobyndaǵy segiz­dikpen júldelerge talasady. Son­dyqtan, jerlesterimizge tabys tileımiz. Sporttyń bul tú­rin­de ne­si­bemiz kem, kim biledi, múmkin tarı­hy­myzdyń jańa paraqtaryn osy qyz­dar ashar. Grek-rım kúresindegi bas balýanymyz Nurmahan Tinálıev Londondaǵy kórsetkishin taǵy qaı­talady. Taǵy da birinshi kezde­sýinde jeńilip qaldy. Sol joly jaraqaty bar edi dedik, bul joly aqtarǵa sebep joq. Nemis balýanynyń qyryp bara ja­t­qany shamaly edi, parterde sa­ǵyzdaı sozǵylaǵanymen, kúshi jet­pedi. Al tańerteńgilik sharshy alańǵa shyqqan boksshylarymyzǵa shynymen qysastyq jasaldy. Boks mamany bolmasaq ta, jaqsy kórermenbiz. Oljas Sáttibaev (52 kılo) ázerbaıjan Elvın Mamı­shazademen terezesi teń aıqas ótkizdi. Tipti, odan góri bizdiń bala alymdylaý boldy. Jeńiske degen qushtarlyǵy, týra soqqylary kóp bolǵan. Biraq jeńis 3:0 esebimen qarsylasynyń qanjyǵasynda ketti. Brazılııa jankúıerlerine, álemniń ár túkpirinen kelgen jýr­nalısterge, boks mamandaryna Qaı­rat Erálıev pen Jánibek Álim­hanuly qatty unaǵan bolatyn. Biri uly Muhammed Álıdiń qorǵanys qabiletin kóz aldyńa ákelse, reseılik boks mamandary Já­nibekten Roı Djonstyń máne­rin kórip, qarsylasynyń oıyn oqyp qoıatyn osy jigit Rıoda top ja­rady dep edi. Boks mamandary, jan­kúıerler kórgen aqıqatty kó­zil­dirik taqqan tóreshilerdiń baı­qa­maıtyny janǵa qatty batty. Munymyz Vasılıı Levıttiń tóreshilerden kórgen quqaıynyń janynda eshteńe emes eken. Keshki sessııanyń eń sońǵy núktesin bizdiń Vasıa Levıt pen reseılik Evgenıı Tıshenko (91 kılo) qoıǵan. Qudaıshylyǵyna kelsek, úsh raýnd bizdiń jigittiń anyq basymdylyǵymen ótti. Úshinshi raýndta Reseı boksshysy qos qolyn qorǵanystan ala alǵan joq, qulap qalmaýdy ǵana oılap júrdi. Bir ókinishtisi, dál osy raýndty tóreshiler sonyń paıdasyna sheship berdi. Osylaısha ýysta turǵan «altyn» sýsyp shyǵyp ketti. Muny jankúıerler ysqyryp qarsy aldy. Al jigitterdiń zańdy jeńisterin urlatyp qoıǵan bokstan atqarýshy dırektorymyz qaıda qarap otyr? Qazaqstan Boks federasııasy she? Munyń aldynda 69 kg salmaqtaǵy Danııar Eleýsinov fransýz Sýleımen Sıssokomen shaıqasta shekesinen jaraqat aldy. Sonymen urys toqtatyldy. Biraq birinshi raýndtaǵy basymdylyǵy arqasynda jeńis Danııarǵa berilip, ol fınalǵa shyqty. Sońynan quramanyń bas jattyqtyrýshysyna habarlasqanymyzda, ol boksshyǵa ota jasalǵanyn estidik. Endi fınalda qııanat jasalmasa eken dep otyrmyz. Osyndaı aýyr oılardan keıin aýyr atletter jarysyna bas suqtyq. Bizdiń Aleksandr Zaıchıkov qossaıysta 416 kılo jınap, úshinshi orynǵa shyqty. Odan bir kılo artyq kótergen armıan Sımon Martırosıan – ekinshi orynda. Al, ózbekstandyq Rýslan Nýrıdınov naǵyz erdiń soıy eken. Kezinde Ilıa Ilınniń kóleńkesinde júrgen bul jigit olımpıalyq rekordty jańartyp baryp, sabasyna tústi. Qossaıysta jınaǵany – 431 kılo. Qola medalge qol jetkizgen Aleksandr: «Tóreshiler sońǵy kezegimdi esepke alǵanda budan joǵary medal bolatyn edi, qaıteıin. Osy jeńisime óz anam men Ilıanyń anasy ólsheýsiz eńbek sińirdi. Árıne, bapkerlerime úlken alǵys aıtamyn. Osy eńbegimdi tileýimdi tilegen barsha qazaqstandyqtarǵa arnaımyn», – dedi. Sonymen, bul kúndi tóreshilerdiń arynda qalǵan úsh jigittiń eńbegin bylaı qoıǵanda, bir kúmis, bir qola medalmen qorytyndyladyq. «Egemen Qazaqstannyń» arnaýly tilshisi Baqtııar TAIJAN Rıo-de-Janeırodan habarlaıdy

JÚLDELER JIYNTYǴY

(15 tamyzdaǵy málimet) № Quramalar Altyn Kúmis Qola Barlyǵy 1 AQSh 26 23 26 75 2 Ulybrıtanııa 16 17 8 41 3 Qytaı 15 14 17 46 4 Reseı 11 12 12 35 5 Italııa 8 9 6 23 6 Germanııa 8 6 6 20 7 Fransııa 7 8 8 24 8 Japonııa 7 4 16 27 9 Avstralııa 6 7 9 22 10 Ońtústik Koreıa 6 3 5 14 15 QAZAQSTAN 2 3 5 10 27 О́zbekstan 2 0 4 6 34 Belarýs 1 2 2 5 50 Ýkraına 0 4 1 5 51 Ázerbaıjan 0 2 1 3 54 Lıtva 0 1 2 3 55 Grýzııa 0 1 1 2 57 Armenııa 0 1 0 1 58 Qyrǵyzstan 0 0 1 1 58 Estonııa 0 0 1 1

Ádilbekke ál bergen...

Keshe Shetpedegi ortalyq alań men jastar orta­lyǵynyń aldynda jas­tar «Ádilbek, biz saǵan senemiz» atty flesh-mob ótkizdi. Ony Mańǵystaý aýdandyq jastar resýrstyq ortalyǵy men aýdandyq salamatty ómir saltyn qalyptastyrý ortalyǵy uıymdastyrdy. Flesh-mobqa Mańǵystaý tehnı­kalyq kolledjiniń stýdent jas­tary men «Jas Otan» jastar qana­ty­nyń músheleri, eriktiler toby­­nyń belsendileri qatysty. Onyń maq­saty jerlesimiz, Rıo-2016 Olım­­­pıa­dasyna qatysýshy Ádil­bek Nııazymbetovtiń jartylaı fı­nal­­ǵa shyǵýyna oraı qoldaý kór­setý, aýdan jastaryn salamatty ómir sal­tyn ustanýǵa shaqyrý, bir sóz­ben aıt­qanda, jastardyń úmitine jiger qo­syp, jerlesterimizdi jeńis tuǵy­ry­nan kórinýge tilektestik bildirý boldy. «Flesh-mob búgin barlyq áleý­met­tik jelilerge taratylyp, jas­tar tarapynan qoldaý tany­tyl­dy. Olımpıada bitkenshe, qoly­myz­ǵa «altyn» túskenshe osyndaı baǵyt­taǵy sharalardy jıi qol­ǵa alýdy josparlap otyrmyz», deı­di eriktiler tobynyń jetekshisi Lázzat Alhamqyzy.  Dúısenbek QOZBAQOV, jastar ortalyǵynyń mamany Mańǵystaý oblysy, Mańǵystaý aýdany

Syr eli Sashasyna sendi

Bul Olımpıada Qyzylorda ob­lysy úshin asa jaısyz bastaldy. Aldymen sporttyq ómirindegi eń bir kemel shaǵyna jetip, olja salý­ǵa oqtalyp otyrǵan Almas О́teshov shettetildi. Odan keıin alty Alashty «altynymen» qýan­­typ, álemniń bar rekordyn jańar­typ júrgen Ilıa Ilınge qaraýlyq ja­sal­dy. Aqyrynda ol da Rıoǵa jiberil­medi. Degenmen, Syr óńiri aýyr at­letıkadan bir sańlaǵyn attandyrdy. Ol Aleksandr Zaıchıkov bolatyn. Burynǵy Olımpıadalarda Aqme­shit atyrabynyń azamattary Ilıa saıysqa túsetin kúni or­ta­lyq alańǵa jınalyp, úlken ek­ran­nan altyn uldyń ónerin tama­­sha­laıtyn. Bul úrdis Alek­sandrǵa kelgende de úzilgen joq. Zaıchıkov saıysqa túserden buryn qala jastary áleýmettik jeli arqyly «Muz aıdynyna» jınalyp, sportshyǵa qoldaý kórsetýge úndeý tastady. Solaısha, túngi saǵat 3:00-den jastar mejeli jer­ge qaraı aǵyla bastady. Jan­kúıer­ler­diń yntasyn baıqaǵan jer­gilikti bılik bar jaǵdaıdy jasap­ty. Tún uıqysyn qıyp, jer­lesine jankúıer bolýǵa jınalǵan jas­tardyń qarasy ájeptáýir. Odan bólek, aımaqtaǵy sport salasynda eńbek etip júrgen azamattar men jas sportshylar da «Muz aıdynynan» tabyldy. 300-ge tarta adam A.Zaıchıkov ónerin ishine demin tartyp kórdi. Sportshy baǵyndyrǵan salmaqty ózderi kóterip jatqandaı sezinip, jyraqta otyrsa da, onyń árbir áreketin ekran arqyly kirpik qaqpaı tamashalady. Julqı kóterýden 193 kılo ziltemirdi basynan asyryp tastaǵanynda tutas zal shýlap ketti. Birin-biri qushaqtap, Zaı­chıkov­tyń jetistigimen qut­­tyq­­tap máre-sáre bolysty. Ser­pe kóterýden alǵashqy tapsyry­syn 223 kılo dep kórsetkende, jan­­kúıer­ler Aleksandrdyń júl­deli oryn­ǵa umtylǵanyn anyq baı­qady. Al­ǵash­qy tapsyrysty min­siz oryn­daǵan­d­a, jıylǵan jurt­shylyq dúr ete qalǵan. Al ekinshi tapsyrysty oryn­daı almaǵanda, tutas zal kúńi­re­nip ketti. Biraq bul eshteńe emes eken. Úshinshi talpynysynda 227 kılo­ny baǵyndyryp, qýanysyp jat­qan­da, tóreshiler onyń bul talpy­ny­syn eseptemeı tastady. Jan­kúıer­lerdiń kóńili sý sepkendeı basylyp, narazylyq bildirip jat­ty. Deı turǵanmen, Zaıchıkov qossaıystyń nátıjesinde 416 kılony baǵyndyryp, qola júldege ıe bolǵanda, jankúıerlerdiń qýany­shynda shek joq edi. О́ıtkeni, eki bir­deı sańlaǵyn Olımpıa­da­ǵa qosa almaı, ishteı býlyǵyp júrgen jurt­­shy­lyqqa Zaıchıkov ıelengen «qolanyń» qadiri «altynmen» para-par bolatyn. – Syr eliniń halqy óz sportshysyna osylaı qoldaý bildirýdi birazdan beri úrdiske aınaldyrdy. Jastar ózderi bastama kóterip, Aleksandr Zaıchıkovqa jankúıerlik tanytaıyq degende, qýana qoldadyq. Sportshymyzdyń júldeli orynnyń birine taban tireıtinin bildik. Qola medaldy de qanaǵat tutyp otyr edik. Degenmen, onyń kú­mis júlde ıelenetin de múmkindigi bol­dy. Biraq buıyrǵany osy eken. Jer­lesimizdiń bul jetistigine shyn nıetimizben qýanyshtymyz. Osy arqyly Zaıchıkov Syr topy­ra­ǵyn­da aýyr atletıkanyń myqtap damy­ǵanyn, el qorjynyna olja sala­tyn oǵlandardyń az emes eke­nin dáleldedi, – deıdi oblystyq dene­­shy­nyqtyrý jáne sport bas­qar­ma­sy basshysynyń orynbasary Jaqsylyq Ospanov. Erjan BAITILES, «Egemen Qazaqstan» QYZYLORDA

Tegeýrini temirdeı

Búginde jasy 28-ge kelip, Olımpııalyq oıyndardyń kúmis júldegeri atanyp otyrǵan boksshy Vasılıı Levıttiń sharshy alańdaǵy juldyzy erte janǵanymen, ómir jolynda bulǵaǵy kóp buralańdy sátter óte kóp kezdesti. Onyń kenetten kók aspandy kúrkiretip ótkendeı keremet tabysqa jetip, jarq ete qalǵan tustary da, kútpegen jerden kúrtikke kúrt súrinip ketip, kúmiljı qadam basqan shaqtary da az bolǵan joq. Biraq qanshama ret basynda ustanǵan baǵytynan taıyp túsip, júrisinen jańylyp jatsa da, jankeshti tirlikke jilik jalǵaı otyryp, burynǵy qalpyna qaıta oralyp kelip jatty. Árbir kelgen saıyn ol óz salmaǵyndaǵy eń myqty ekenin ózine de, ózgege de udaıy dáleldep berip turdy. Osy erik-jigeri myqtylyǵynyń arqa­syn­da Vasıa burnaǵy kúni Rıo rınginiń bıik tuǵyryna kóterildi. Onyń sol kúni reseılik Evgenıı Tıshenkomen bolǵan jekpe-jeginde qarsylasyna des bere qoımaǵany, qaıta oǵan basymdyq kórsetkeni týraly qazir jan­­kúıer­ler, mamandar men sportshylar ara­­synda pikir bildirip jatqandar kóp. Biz bul ja­ǵyna barmaı-aq, Vasılııdiń atalǵan urys­ty ózine laıyqty deńgeıde ótkizgenin aıtý­men ǵana shekteleıik. Ol osy joly tórt jylda bir aınalyp keletin Oıyndardyń fınaldyq aıqasynda kúsh synasýy arqyly da Olımp shyǵyrshyǵynyń shyrqaý shyńyna jete alǵanyn kórsetip berip otyr. Al mund­aı qurmet qandaı bir boksy damyǵan derjava­nyń óziniń kez kelgen kúshti bylǵary qolǵap sheberiniń mańdaıyna jazyla bermegen. Osylaısha el-jurtyn qýanyshqa bólep otyrǵan Vasıa 1988 jyldyń 24 aqpanynda Qostanaı oblysyndaǵy Fedorov kentinde qarapaıym eńbek adamdarynyń otbasynda týǵan. Ol bala jasynan kıkboksıngpen aınalysady. Jetinshi synypqa kóshken jyly oqýyn Qostanaı qalasynda turatyn ata-ájesiniń qolynda jalǵastyrady. Mun­da kelgesin boks seksııasyna jazylyp, jekpe-jek urys óneri bul túriniń álip­pe­sin de meńgerýge kirisip ketedi. Bir joly bular bir jarysqa baryp qatysady. Jattyq­tyrý­shylar quramy sonda Vasıany bokstyń da, kıkboksıngtiń de saıystaryna qosyp jiberedi. Nátıjesinde shymyr bolyp ósip kele jatqan qaıtpas qaısar jasóspirim eki jarysta da ozyp shyǵady. Biraq bapkerler osydan keıin bir mámilege kelip, ony budan bylaı tek boks jarysyna ǵana qatys­tyryp turýǵa sheshim qabyldaıdy. Boks­tyń olımpııalyq sport túri ekenine basa nazar aýdarǵan olar Vasıanyń munymen túbegeı­li aı­na­lys­sa, biraz jetistikke jetýge múmkin­digi bar ekenine mán beredi. Aınalyp kelgen­de, sol ustazdary qatelespegen bolyp shyqty. – Meniń boksshy bolyp qalyptasýymnyń alǵashqy negizin qalaǵan búginde marqum bolyp ketken Asylhan Busyrmanov esimdi jattyqtyrýshym edi. Sol kisiniń tabandy eńbegi men yjdaǵatty áreketiniń arqasynda men shyn máninde boksshy bolyp shyqtym, – deıdi Vasılııdiń ózi qazir ótken ómir joldary týraly sóz etkende. Sóıtken boksshynyń baq juldyzy jasy 21-ge kelgende jana bastady. Ol 2009 jyldyń qysynda aldymen Qazaqstan chempıonatynda top jardy. Altyn medal úshin talasta óziniń jerlesi Jan Kosobýskııdi upaı sanymen utty. Sol jyly maýsym aıynda Qytaıdyń Chjýhaı qalasynda ótken Azııa chempıonatynyń fınalynda alań ıeleriniń úki taqqan úmiti Lı Bındi ekinshi raýndta iske alǵysyz etip sabap, qurlyqtyń da myqtysy atandy. Al qyrkúıek aıynda Italııanyń Mılan qalasynda jalaý jelbiretken álem birinshiligine qatysyp, 1/16 fınaldyq ekinshi urysynda ıtalııalyq tájirıbeli boksshy Klemente Rýssoǵa jol berýge májbúr boldy. Bul sátsizdik kelesi jyly da jalǵasty. Aldymen Qazaqstan chempıonatynyń fınalynda manaǵy Janǵa ese berip qoıdy. Sodan keıin Qytaıdyń Gýanchjoý shaharynda sharshy alańdy terbetken Azııa oıyndarynyń 1/8 fınalynda sırııalyq Mohammed Chossoýnnan utylyp qaldy. Vasılıı kelesi, 2011 jyly Qazaqstan chempıondyǵyn qaıtaryp aldy. Biraq sodan qaıtyp elimiz quramasy sapynda iri halyqaralyq jarystarǵa barǵan joq. Sol jyly Azııa chempıonatyna munyń salmaǵynan negizi kıkbokser Danııar Úsenbaev attanyp, qorjyny bos qaıtty. Sodan keıin bul salmaqtaǵy basty oryn Anton Pınchýkke berildi. Ol 2013 jyly Azııa chempıonatyn­da, 2014 jyly Azııa oıyndarynda altyn medal aldy. Sonymen, Vasıanyń bul sal­maq­taǵy esigi jabylyp qalǵandaı edi. Onyń baǵyn qaıta jandyrǵan Búkilálemdik boks serııasy boldy. Osynda «Astana arlans» komandasy quramyna alynǵan ol aqy­rynda óz salmaǵynda úzdik dep tanyldy. Osy­nyń arqasynda Rıo-de-Janeırodaǵy Olım­pııa­lyq oıyndardyń lısenzııasyna qol jetkizdi. Sondyqtan Qazaqstannan bul salmaqta basqa boksshyǵa joldama úshin kúresýdiń joly aldyn ala jabylyp qalǵan edi. Rıodaǵy boks týrnırinde Vasılıı Levıt teńdessiz tórt urys ótkizdi. Onyń birinshi­sinde qytaılyq Iý Fengkaıdy úshinshi raýnd­ta tehnıkalyq nokaýtpen jeńdi. Ekin­shi jekpe-jeginde mavrıkııalyq Djems Ken­nedı st. Pıerreni, al jartylaı fınalda kýba­lyq Erıslandı Savondy upaı sanymen utty. Ol Bostandyq aralynyń ókilimen Búkil­álem­dik boks serııasynda da kezdesip edi. Sol joly tóreshilerdiń bura tartýymen jeńis onyń qarsy­lasyna berilip ketken. Sonyń qaı­tary­myn Vasıa Brazılııa jerinde keltirdi. Bul jeńis oǵan kúmis medal bolyp qaıta oraldy. Buǵan deıin osydan 7 jyl buryn alǵan Azııa chempıony degennen ózge halyqaralyq dárejedegi ataǵy joq Vasılıı Levıt úshin ǵana emes, kez kelgen sportshy úshin Olım­pııalyq oıyndarda kúmis medalǵa qol jetkizý tolaǵaı tabystardyń biri bolyp tabylar edi. Serik PIRNAZAR, «Egemen Qazaqstan» Sýretti túsirgen Danııar MAILYBAEV

Boksqa baptap uıadan...

Marat Eleýsinovtiń esimi elimizge jaqsy tanys. Ol belgili boks mamany ǵana emes, sonymen birge, Dáýren men Danııar Eleýsinovterdeı eki chempıondy boksqa baýlyp, sharshy alańda óner kórsetýdiń qyr-syryn úıretken, qazirde sol jigitterdiń jeke jattyqtyrýshysy ári ákesi. Jaqynda Olımpıada bastalar aldynda biz boks mamanymen kezdesip, áńgimelesken edik. – Qazirgi tańda ulttyq qura­ma­nyń kapıtany bolyp júr­gen ulyńyzdy qalaı boksqa baýly­dyńyz? Onyń boksqa degen yntasyn qalaı baıqadyńyz? – Boksqa negizinen 10 jastan alynady. Biraq Danııar erte aınalysyp ketti. 8 jasynan Dáýrenge jattyǵý júrgizip jatqan kezde zalǵa kelip, ilinip turǵan qapty uryp júretin. Bir kúni 1989 jyly týǵan, bokspen alty aıdaı aınalysyp júrgen balalarǵa sparrıng jasatyp jatqanmyn. Boıy kishirek bala bolǵan. Bir kezde Danııar qasyma kelip: «Áke, men myna balamen sharshy alańǵa shyǵaıynshy», dedi. «Oı, balam qoı, onyń senen jasy úlken, alty aı shuǵyldanyp júr, sen áli aınalysyp júrgen joqsyń», – dedim. Jalynyp bolmaı qoıdy. «Jaraıdy» dep shyǵardym. Qarasam, Danııar soqqy ótkizbeıdi. Artqa shal­qaıǵanda, qarsylasynyń qoly jetpeı qalady, qarsy soq­qy jasap úlgerip jatty. Osyny kórgennen keıin, aınalysyp jatqan topqa qosyp qoıdym. – Danııar men Dáýrendi, ózińiz­di sport súıer qaýym jaqsy biledi. Al qos chem­pıonnyń anasy, otbasynyń ózge de músheleri týraly aıtyp ber­seńiz. – Eki ulymnyń jetis­­tik­terine jubaıym Ǵalııanyń qosqan úlesi zor. Tamaqtaryn, jattyǵý kıimderin daıyndaıdy. Tipti, bıntterine deıin jýyp, ázirlep qoıady. Sol bala­lar­dyń jaǵdaıyn jasap otyrý úshin muǵalimdik qyzmetinen de ketti. Qazir úı sharýasymen aınalysady. Almaty oblysynyń týmasy, ózim Batys Qazaqstan obly­synan­myn. Almatyda júr­gende tanystyq. Bıyl, qudaı qalasa, otasqanymyzǵa 32 jyl bolady. Qyzymyz bar. Esimi – Dınara. Turmysta. Bıge áýes boldy. Túrli baıqaýlarǵa qatysyp, júldeler alyp júrdi. Joǵary oqý ornynda horeografııadan bilim aldy. 2007 jyly Astanaǵa kóship keldik. Qyzymyz osynda mem­lekettik «Naz» bı ansamblinde jumys istedi. Qazir ishki áskerdiń ansamblinde. Dáýren 2010 jyly úılendi. Eki nemeremiz bar. – Ǵalııa apaıymyz uldar­dyń sharshy alańdaǵy óner­lerin tamashalaı ma? – Osy Astanada bolatyn jarys­tardy qalt jibermeıdi. Jankúıer bolyp otyrady. Boks­­shy­lardyń aty-jónderin, jetis­tikteriniń bárin biledi. Basty jankúıerimiz deýge de bolady. – Nemere tátti ǵoı, aǵa. Ata bol­ǵan qalaı eken? Boksshy bolamyn deı me? – Oqý-jattyǵý jıynynan keıin sony saǵynyp kelemin. Alysta júrgende telefonmen sóı­le­semin. Nemere óte ystyq bolady eken. Ábil­mansur nemeremniń oıyny da boks. Danııar­dyń 14-15 jasta kıgen boksshynyń aıaq kıimin, ústin­degi kıimin kıip alyp, boks zalyna barady. Ony sheshpeıdi. Jylap sómkesine salyp alady. «Anda baryp kıemin» deıdi. Zalda qolyn bıntpen orap alyp júredi, soqqy jasaıdy. Boksshy bolamyn dese, esh qarsylyǵym joq. Boks ta óner ǵoı. Danııar aıtqandaı, boks – tóbeles emes, ol – naǵyz óner. – Marat aǵa, ókinetin, «qap, átteń» deıtin kezderińiz bar ma? – (Kóp oılanyp baryp) Bar ǵoı… Dáýrendi jattyqtyrǵanda, bylaı isteýim kerek edi, bylaı jasaýym kerek edi dep, keıin sol kezde jibergen qatelikterimdi Danııar­dy jattyqtyrǵanda jiber­meýge, túzetýge tyrysasyń. Dáýren sol kezde Qazaqstan chem­pıony bola tura, jastar ara­syndaǵy álem chempıonatyna qatysa almady. Sol kezde bir áre­ket jasaýym kerek pe edi dep oılaısyń. Biraq, Allaǵa shúkir, buıyrǵan ketpeıdi deıdi ǵoı. Buıyrmaǵan nárse, tipti, qalaı tyryssań da bolmaıdy. – Jattyqtyrýshy tek sport­­tyń qyr-syryn óz tár­bıelený­shisiniń boıyna sińirip qana qoımaı, ár kezde qoldaý kórsetetin psıholog ta bolýy kerek qoı. – Árıne. Jeńilisten keıin esh ýaqytta Dáýrenge de, Danııarǵa da urysqan emespin. «Bári jaqsy, bári durys, balam. Eshteńe etpeıdi, keıin analız jasaımyz», dep balalardy jubatamyz. – Balalaryńyzdyń qatty ýaıym­dap, qınalǵan sátteri bol­ǵan shyǵar. – Danııardyń qatty qınalǵan sáti Olımpıadada qol sozym jerde medaldan aıyrylyp qalǵan kezi. Shırek fınalda ıtalııalyq boks­shysyna jol bergen edi. Biraq bir jyldan keıin, Almatydaǵy álem chempıonatynda esesin qaıtardy. Jarystardyń bárin taspaǵa jazyp alýǵa tyrysamyz. Qarsylastarynyń qımylyn, ózderiniń júrgizgen boksyn úsheýmiz otyryp qaraımyz. Saraptama jasaımyz. – Kitap oqısyz ba? – Oqý-jattyǵý jıynyna ketkende kitap oqımyz. Danııar da kitaptar alyp ketedi. Osy soń­ǵy oqý-jattyǵý jıynynda Shákárim Qudaıberdiulynyń óleńder jınaǵyn oqydym. Danııar da kitapqumar. «Abaı jolyn» qolynan tastamaıtyn. Áńgimelesken Dastan KENJALIN, «Egemen Qazaqstan»