Jýyrda Qazaqstan Respýblıkasy Prezıdentiniń Arhıvine memleket jáne qoǵam qaıratkeri Toqtaǵalı Jangeldınniń otbasynda saqtalǵan qosymsha qujattar qabyldanyp alyndy. Erlen Toqtaǵalıuly ákesiniń ózderinde saqtalǵan qujattaryn baýyrlarynyń ruqsatymen ótkizýge sheshim qabyldaǵan. Qarashanyń 25-inde Toqtaǵalı Jangeldınniń 100 jyldyq mereıtoıy atalyp ótpekshi. Mereıli sátti atap ótý jumysyn Qazaqstan Respýblıkasy Prezıdentiniń Arhıvi jyl basynan beri belsendi júrgizip keledi. Jeke qor ıesiniń ómirbaıandyq derekterine súıene otyryp, onyń qyzmet etken jerlerindegi qujattaryn izdep taýyp, jeke qor quramyna qosý úshin Shymkent óńirlik memlekettik arhıvinen T.Jangeldınniń óz qolymen toltyrǵan jeke is paraǵy, oǵan berilgen qyzmettik minezdeme, túrli jıyndar men májilisterde sóılegen sózderi mátinderiniń kóshirmesi alyndy.
Jeke qordyń qujattaryn ótkizý-qabyldaý rásimi Qazaqstan Respýblıkasy Prezıdentiniń Arhıviniń dırektory, tehnıka ǵylymdarynyń doktory, professor B.Japarovtyń, atalmysh mekeme ujymynyń qatysýymen saltanatty jaǵdaıda ótkizildi.
Kezdesý barysynda Arhıv dırektory B.Japarov qor ıesiniń ómiri men qoǵamdyq-saıası qyzmetine toqtalyp, jeke qordyń quramyndaǵy qujattardyń mazmuny jóninde qysqasha áńgimelep berdi. Sodan soń, sóz kezegin alǵan Erlen Toqtaǵalıuly ata-anasy, baýyrlary jaıynda áńgime qozǵap, tapsyrylyp otyrǵan qujattarǵa qysqasha sholý jasady.
Qujattardyń ishinde ómiri men qyzmetine qatysty aqparattar, kýálikter, hat almasýlar, Belorýssııanyń memlekettik arhıvterinen alynǵan qazaqstandyq partızandar týraly arhıvtik anyqtamalar, S.Seıfýllın týraly jazylǵan eńbegine paıdalanǵan qujattary, sonymen qatar, dıssertasııalyq jumystary, ǵylymı maqalalary, partızan qozǵalysy týraly jazǵan kitabynyń baspahanalyq grankasy jáne t. b. derekter, fotosýretter bar.
Raýan QAIDAR,
«Egemen Qazaqstan»