Qazirgi kezde Almatyda 28-shi Búkilálemdik qysqy Ýnıversıada oıyndaryna jan-jaqty daıyndyq jumystary júrgizilip jatyr. Bul jarys kelesi jyly elimizde ǵana emes, TMD keńistiginde alǵash ret ótkiziledi.
Sporttyń 12 túrinen 2000-nan astam sportshy qatysady. Ýnıversıada dıreksııasynyń basshysy Naıl Nýrovtyń aıtýynsha, jarysqa qatysý úshin resmı túrde 58 el tirkeldi.
– 2011 jyly Túrkııanyń Erzýrým qalasynda ótken synǵa osynshama eldiń sportshylary qatysqan bolatyn. Sondyqtan kelesi jyly Almatyda jalaýyn kóteretin jarysqa 58 memlekettiń ókilderi kelse, bizdiń qalamyz Ýnıversıada tarıhynda eń kóp elder qatysqan memleketterdiń biri bolady, – deıdi ol.
Ýnıversıadada jarystar 8 sport saraıynda ótedi. Sonymen birge, Ýnıversıadaǵa 127 halyqaralyq tóreshi men 600-ge jýyq ulttyq tenıkalyq maman qatysatynyn, al jarys kezinde Oıyndardy basqarý ortalyǵy jumys isteıtinin aıtty.
Almaty qalasynyń IID-men birigip, Ýnıversıada kóliginiń negizgi jáne balamaly qozǵalysy bekitildi. Barlyq avtokólikter GPS navıgatorymen qamtylady. Avtokólik qozǵalysyn qadaǵalaıtyn arnaıy dıspetcherlik ortalyq jumys isteıdi.
Medısınalyq kómek kórsetý úshin Almatynyń 8 stasıonary men 30 jedel kómek kórsetý brıgadasy qyzmet etedi. Atletter qalashyǵynda medısınalyq ortalyq bolady. Sondaı-aq, onda dopıngtik-baqylaý stansalary uıymdastyrylady.
Qyrkúıek aıynda JOO-nyń stýdentteri arasynan eriktilerdi irikteý josparlanǵan. Irikteý aıaqtalǵan soń, qazan aıynan 2017 jyldyń qańtaryna deıin, eriktilerge arnalǵan oqytý semınarlary men trenıngteri ótedi.
Qazir eriktilerge baılanysty jumys qyzý júrip jatyr. Mysaly, joǵary oqý oryndary, ishki ister jáne tótenshe jaǵdaı departamenti men medısına qyzmetkerlerine tegin aǵylshyn tiliniń kýrsy uıymdastyrylǵan. Búginde 600 adam oqytyldy. Ýnıversıada bastalǵansha 2 myń qyzmetkerge aǵylshyn tilin úıretý josparlanǵan.
Qysqy Ýnıversıadanyń estafetasy 25 qańtarda bastalyp, Astana qalasyndaǵy Nazarbaev Ýnıversıtette alaýy jaǵylady. Alaý estafetasy elimizdiń barlyq óńirlerinde ótkiziledi. Sodan keıin ol Almatyǵa jetkiziledi. Josparǵa sáıkes, 16 alaý bir jerde toǵysyp, úlken bir alaýǵa aınalady.
Ýnıversıada dıreksııasynyń basshysynyń aıtýynsha, jarystar 80 elge taraıdy. Olardy kún saıyn 1 mlrd. adam tamashalaı alady.
Jarysqa arnalǵan barlyq sport ordalarynyń esigi halyqqa aıqara ashyq bolady. Qazir qala qonaqtary men turǵyndary úshin Ýnıversıada sport alańdarynyń qoljetimdiligi týraly baǵdarlama jasalǵan.
– Ýnıversıada – el tarıhynyń 25 jylyndaǵy eń iri mýltısporttyq jarys. Oıyndardyń arqasynda, Almaty qalasy jańa nysandarmen tolyǵyp jatyr. Kóp salaly muz keshenderi, olımpıadalyq qysqy sport túrlerin damytatyn, tanytatyn alańǵa aınalady,– deıdi Naıl Nýrov.
Dastan KENJALIN,
«Egemen Qazaqstan»