Qazaqtyń qabyrǵaly qalamgeri, ári jýrnalıst, memlekettik syılyqtyń laýreaty Ázilhan Nurshaıyqovtyń esimi qazaq ádebıeti tarıhynda altyn árippen jazylǵan desek bolady. Onyń qalamynan týǵan «Mahabbat, qyzyq, mol jyldar», «Máńgilik mahabbat» shyǵarmalary búginde halyqtyń jadynda, sanasynda saırap tur. Búginde Ázilhan Nurshaıyqovqa arnalǵan «Mahabbat alleıasy» óziniń týyp ósken jeri Jarma aýdanynyń ortalyǵy Qalbataý aýylynda boı kóterdi.
El táýelsizdiginiń 25 jyldyǵyna oraı uıymdastyrylyp otyrǵan shara – óskeleń urpaqtyń búgini men erteńin aıshyqtaıtyn arqaly kópir ispettes. Esimin Áz-aǵa dep, urpaǵy ulyqtap ótken jazýshynyń «Mahabbat alleıasyna» jazýshynyń shyǵarmasymen sýsyndap ósken aǵa-býyn ókilderi men aýdan jurtshylyǵy qatysty. Saltanatty sharany ashqan aýdan ákimi Nurlan Sydyqov Jarma jurtynyń tól perzentin ulyqtap, esimin jańǵyrtyp jatqan qadamymen quttyqtady. Mahabbattyń jyrshysy atanǵan jazýshyǵa qandaı qurmet kórsetilse de laıyq ekendigin atap ótti.
Osydan úsh jyl buryn jýrnalıst Rıza Moldasheva «Umytsaq, urpaǵyńdy keshire gór» atty maqalasynda «Mahabbat, qyzyq mol jyldar» romanynyń keıipkerlerine eskertkish qoıylsa degen usynys aıtqan bolatyn. Mine, búginde utymdy aıtylǵan usynys is júzinde júzege asyp otyr. Mahabatty jyr qylyp, adaldyqty tý etken Áz aǵańnyń eskertkish taqtasy shańyraq kótergen jastar táý etip keletin qasterli orynǵa aınalary sózsiz.
Aıman MUQYShEVA