16-17 tamyz kúnderi О́skemen qalasynda Qazaqstan Respýblıkasy men Reseı Federasııasy ishki ister mınıstrlikteriniń ekinshi birlesken alqa otyrysy ótti. Onyń jumysyna eki memlekettiń ishki ister mınıstrleri Qalmuhanbet Qasymov pen Vladımır Kolokolsev, olardyń orynbasarlary, qyzmetter men shekaralas ishki ister organdarynyń basshylary, sonymen birge, Shyǵys Qazaqstan oblysy ákimdiginiń ókilderi qatysty.
Delegasııa basshylary ekijaqty vedomstvoaralyq qatynastardyń damý barysyna joǵary baǵa berip, alǵashqy birlesken alqa májilisiniń sheshimderin (Astrahan q., 2015 jyl) iske asyrýdaǵy qadamdar, ásirese, shekaralas aımaqtarda qylmysty aldyn ala tergeýdi júzege asyrýdaǵy yntymaqtastyq jandanǵanyn aıtty. Al Q.Qasymov qylmysqa qarsy kúres máselesindegi mınıstrlikterdiń ózara is-áreketi jańa sapaly deńgeıge kóterilgenin atap kórsetti.
Otyrys barysynda eki memlekettiń ekstremızmge qarsy kúreste birlese áreket etý máseleleri talqylandy. Terrorıstik jáne ekstremıstik qylmysqa qatysy bar izdeýde júrgen adamdar, terrorıstik jáne ekstremıstik uıymdar týraly aqparat almasýdy jandandyrý joldary qarastyryldy. Sondaı-aq, kezdesýde jol qozǵalysyn qamtamasyz etý salasyndaǵy ishki ister organdarynyń ekijaqty yntymaqtastyǵynyń jaı-kúıi men bolashaǵy sóz bolyp, ony jetildirý sharalary pysyqtaldy.
Budan bólek, taraptar avtokólik quraldaryn tirkeý jáne esepten shyǵarý, tirkeý jáne júrgizýshi kýálikterin berý, sonymen qatar, kólik quraldary men ony urlaýǵa qatysy bar adamdardy tabý úshin jedel izdestirý sharalaryn júrgizý jóninde ózara is-qımyl jasaý týraly jedel málimet almasýdy jandandyrýdyń joldary haqynda pikir almasty.
Otyrys qorytyndysy boıynsha delegasııa basshylary ekstremızmmen kúres jáne jol qaýipsizdigin qamtamasyz etý salasyndaǵy yntymaqtastyqty óristetýge baǵyttalǵan sheshimge qol qoıyp, birlesken alqa otyrysynyń aldaǵy jylǵa arnalǵan jumys josparyn bekitti.
«Egemen-aqparat»