«Osyndaı toı Otyrarda buryn-sońdy bolmaǵan», dep aqyn Sabyrhan Asanov jyrlaǵandaı, kúni keshe osynaý kıeli óńirde án merekesi bolyp ótti. Keltirip otyrǵan óleń joldary dańqty kompozıtor Shámshi Qaldaıaqovtyń ataqty ániniń mátininen alynǵan.
Tutas bir urpaqty ásem sazymen áldılegen, áýenimen tárbıelegen Shákeń shynynda da baqytty jan. Elimizdiń ánurany bolyp qabyldanǵan «Meniń Qazaqstanym» ánine bıyl 60 jyl tolsa, onyń memlekettik rámizder qataryna engenine 10 jyl boldy. Kompozıtordyń kindik qany tamǵan ólkesindegi toı osyndaı mereıli datalarmen tuspa-tus kelgendikten, óte joǵary deńgeıde uıymdastyryldy.
Aýdan ortalyǵyndaǵy Mádenıet saraıynda «Meniń Qazaqstanym» án baıqaýynyń aqtyq saıysy ótti. Oblystyq deńgeıdegi is-shara sýretshi Ádilhan Málik pen bir top shákirtteriniń «Saǵynysh sazyn samǵatqan – Shámshi» atty sýret kórmesimen bastalyp, án baıqaýymen jalǵasyn tapty. Shırek ǵasyrǵa jýyq tarıhy bar konkýrs aýdanymyzda alǵash ret uıymdastyrylyp, oǵan saıdyń tasyndaı iriktelgen 20 úmitker qatysyp, óz ónerlerin ortaǵa saldy.
«Meniń Qazaqstanym» án festıvaliniń Gala-konserti Sh.Qaldaıaqov aýylyndaǵy «Alpamys batyr» sport kesheninde jalǵasyn tapty. Keshke arnaıy qatysqan oblys ákimi Beıbit Atamqulov barsha ońtústik jurtshylyǵyn óner merekesimen quttyqtap, sóz sóıledi.
– Shámshi murasyn bolashaq urpaqqa jetkizý, ásem ánderin nasıhattaý barysynda áli talaı-talaı sharýalar jasaý – bizdiń azamattyq boryshymyz. Shámshi Qaldaıaqov atyndaǵy «Meniń Qazaqstanym» án baıqaýy jylda Shymkent qalasynda ótip kelgen bolatyn. Sondaı-aq, kórnekti aqynymyz Jumeken Nájimedenovtiń sózine jazylǵan «Meniń Qazaqstanym» ánine bıyl 60 jyl toldy. Osyǵan oraı, baıqaý bıylǵy jyly Shámshi aǵamyzdyń týǵan aýylynda alǵash ret ótýde. Kelesi jyldan bastap atalǵan baıqaýdy oblysymyzdyń barlyq aýdan, qalalarynda ótkizý úrdiske aınalatyn bolady. 2017 jyly bul festıvaldy Sozaq aýdanynda ótkizýdi usynamyn, – dedi oblys basshysy.
Sondaı-aq, ol elordamyz Astana qalasynda dara talant ıesine ońtústiktiń atynan eńseli eskertkish ornatylatynyn, Shámshiniń týǵan aýylynda da eskertkishin qoıý jáne mýzyka mektebin ashý týraly oıymen bólisti.
Quttyqtaý sózinen soń óńir basshysy júzden júırik shyqqan ən baıqaýynyń jeńimpazdaryn marapattady. III orynǵa Túrkistan qalasynan kelgen «Asý» dýeti laıyqty dep tanyldy. Oblys əkiminiń arnaıy júldesi arystyq Juldyz Ádilbekovaǵa buıyrdy. Júldeli II oryndy sozaqtyq Gúlbaný Shalabaeva ıelense, baıqaýǵa Shymkent qalasynan synǵa túsken Turǵynbek Bekzat I orynnan kórindi. Al baıqaýdyń bas júldesine kompozıtordyń jerlesi, Otyrar aýdanynyń týmasy Rýslan Aqynbekov ıe boldy.
Barsha konkýrsanttarǵa oblys ákiminiń arnaıy syılyǵy tabystalyp, el Táýelsizdiginiń 25 jyldyǵyna oraı ótkizilgen mádenı shara ońtústik ónerpazdarynyń konserttik baǵdarlamasyna ulasty.
Almas AQYLBEK,
jýrnalıst
Ońtústik Qazaqstan oblysy