Aqtaý halyqaralyq teńiz saýda portynyń aýmaǵyndaǵy alǵashqy áskerı aılaqtyń qurylysy aıaqtalyp keledi. Nysan bıylǵy jyldyń qazan aıynda resmı túrde tapsyrylady dep kútilýde.
Aılaqtyń qurylysy aqpan aıynda bastalǵan bolatyn. Qazirgi kezde gıdrotehnıkalyq qurylystaǵy jumys qyzý júrip jatyr. Bul Qazaqstan Respýblıkasy Qarýly Kúshteri Áskerı-teńiz kúshteriniń tarıhynda áskerı maqsattaǵy tuńǵysh aılaq bolaıyn dep tur. Qazirgi sátte qazaqstandyq áskerı kemeler áskerı-teńiz bazasynan 140 shaqyrym qashyqtyqtaǵy Baýtıno kentindegi jalǵa alynǵan pırsta ornalasqan. Bul Aqtaý qalasynda turatyn áskerı qyzmetshilerge belgili bir qolaısyzdyq týǵyzýda. Osylaısha, jekemenshik teńiz pırsynyń boı kóterýi Áskerı-teńiz kúshteri úshin mańyzdy oqıǵa bolyp tabylady.
Aılaqtyń qurylysymen Aqtaý shahary portynyń aýmaǵyndaǵy 1,2 ga jer teliminde «Áskerı qurylys» aksıonerlik qoǵamy aınalysýda.
«Aqtaý qalasynyń portynda alǵashqy Áskerı-teńiz kúshteri kemeleriniń ornalasý pýnktiniń salynýy Áskerı-teńiz kúshterine Kaspıı teńiziniń qazaqstandyq sektoryndaǵy yqtımal qaýip-qaterlerge tıimdi jáne ýaqtyly den qoıýǵa, Kaspıı teńiziniń kez kelgen aýdanyna kemelerdiń shyǵýyn jedel júzege asyrýǵa jáne materıaldyq-tehnıkalyq qamtamasyz etýdiń barlyq túrlerimen qamtamasyz etý men tasyp jetkizýdi der kezinde uıymdastyrýǵa, tehnıka men qarý-jaraqtyń motoqoryn únemdeýge múmkindik berip, janar-jaǵarmaı materıaldaryna jumsalatyn shyǵyndy aıtarlyqtaı qysqartady», – dedi óziniń sózinde Qazaqstan Respýblıkasy Qarýly Kúshteri Áskerı-teńiz kúshteriniń qolbasshysy vıse-admıral Jandarbek Janzaqov.
«Egemen-aqparat»