Qazaqstan boks federasııasy keshe óte bir jaqsy uıǵarym jasady. Rıo-de-Janeıro rınginde kúmis medal alǵan Vasılıı Levıtke Olımpııalyq oıyndardyń altyn júldegeri úshin belgilengen 250 myń dollar mólsherinde syıaqy tólenetin boldy.
Federasııa muny qazaqstandyq bylǵary qolǵap sheberiniń reseılik Evgenıı Tıshenkomen Riosentro sport kesheninde ótkizgen fınaldyq jekpe-jegindegi keremet óneriniń laıyqty baǵalaný dep túsindirdi. Shynynda Vasılıı bul shaıqasta óte joǵary deńgeıden kórindi. Urys bitip, tóreshiler jeńisti bir aýyzdan onyń qarsylasyna berip jibergende, zal toly kórermen habarlamany ysqyryp qarsy aldy. Bul oqıǵa keıin búkil álemde óziniń jańǵyryǵyn alyp ketti.
«Qazaqstan boks federasııasy Vasılıı Levıtti olımpııalyq medal jeńip alýymen quttyqtaıdy. Onyń Rıodaǵy urystary álemniń ártúrli elderindegi bedeldi boks sarapshylarynyń, eń bastysy, Qazaqstandaǵy sııaqty, syrt jaqtarda da qyzý qoldaý kórsetetin jankúıerleriniń eń joǵary baǵalaryna ıe bolyp, Vasılııdiń buǵan shynynda laıyqty ekenin kórsetip berdi. Ol Qazaqstan boks federasııasynyń, jattyqtyrýshylar shtabynyń jáne búkil eldiń senimin aqtady», – dep atap ótilgen osy jaıynda málim etilgen habarlamada.
«AIBA-nyń erejelerine sáıkes, tóreshiler sheshimine narazylyq bildirilmeıdi, al biz Halyqaralyq boks assosıasııasynyń múshesi retinde osy erejeni ustanýǵa mindettimiz. Qazaqstan boks federasııasy tóreshilerdiń sheshimin qurmetteıdi», – delingen budan ári.
«Vasılıı Levıt Olımpıada rınginiń fınaldyq jekpe-jeginde tamasha nátıje, jeńiske degen orasan zor jiger kórsetti. Sondyqtan Qazaqstan boks federasııasynyń prezıdenti Tımýr Qulybaevtyń sheshimi boıynsha, oǵan Olımpıadanyń kúmis medalin jeńip alǵany úshin memleketten tólenetin 150 myń dollarǵa taǵy 100 myń qosylyp, olımpııalyq «altynǵa» teń syıaqy beriletin boldy», – dep jazady federasııanyń baspasóz qyzmeti.
Sýretti túsirgen Danııar MAILYBAEV