«Men úshin ol – chempıon»

Boksshy Ádilbek Nııazymbetov Rıo tórinde kúmis júldeni oljalaǵan soń ári qutty bolsyn aıtý, ári gazet úshin az-kem tildesý maqsatynda onyń ákesi Sábıt Nııazymbetovpen habarlasqan edik. – Ulyńyzdyń júldesi qutty bolsyn, Sábıt aǵa! – Rahmet, bul Ádilbektiń nemese tek bizdiń otbasymyzdyń ǵana emes, búkil elimizdiń, qa­zaqtyń júldesi ǵoı. El-jurt­qa men de qutty bolsyn aıtamyn. – El ishi qazir «Ádilbektiń júldesi altyn bolýy kerek edi» dep baǵa berip jatyr. Ulyńyzdyń judyryqtasýyna qandaı baǵa berer edińiz? – Meniń ulym ekinshi oryn, ıaǵnı kúmis júlde alsa da ol men úshin – chempıon. Halyqtan asqan synshy joq, ony halyq ta aıtyp jatyr, rahmet. Ádilbektiń qarsylasy ońaı shaǵylatyn jańǵaq emes, ol – álemniń úsh dúrkin chempıony, muny da mo­ıyn­daý kerek. Demek, onymen  judyryqtasý nemese nokaýtqa jiberip sula­typ salý ońaı bolmaǵan shyǵar. Desek te men kýbalyq boksshyny altyn júldesimen quttyq­taımyn. Buıyrǵany osy, kúmiske de qanaǵat etý kerek. Ulym álem chempıonatynyń jáne Olım­pııalyq oıyndardyń eki dúrkin kúmis júldegeri atanyp otyr. Munyń ózi – úlken jetistik. «Áke balaǵa – synshy» degendeı, ákesi retinde Ádilbegimniń judy­ryqtasýyna kóńilim toldy. Kezinde qolynan jetektep, boks zalyna alyp barǵan eńbegim de, úmitim de, senimim de aqtaldy. – Keremet! – Men otbasymnyń atynan qoldaý kórsetken barsha Qazaqstan halqyna, Mań­ǵystaý jurtshylyǵyna  alǵys aıtamyn. Aqtaýda teńiz ja­ǵalaýynda tikeleı kórsetilim uıymdastyryldy. Halyq kóp jınaldy, barlyǵy kelip meni quttyqtap jatty, ákege odan artyq ne kerek? Árıne, tek alǵys­tan basqa aıtarym joq. Biraq, shynyn aıtaıyn, balamnyń eki kózine erik bergeni janyma batty. Ol óziniń jeńilmegenin jaqsy túsinedi, biraq bul – sport. «Altyn medal almadyń» dep eshkimdi eshkimniń kinálaýǵa, kú­stánalaýǵa haqy joq. Men ulymnyń  jeke bapkeri Marat Jákıevke erekshe alǵysymdy aıtqym keledi. Sátin salsa, Ádil­bekke qarap, Olımp bıigin baǵyn­dyratyn bylǵary qolǵap sheberleriniń qatary kóbeıe bersin. Qazaqtyń kók baıraǵyn kók­ke jelbiretetin jas býyn ósip-jetilsin dep tileımin. Áńgimelesken Gúlaıym ShYNTEMIRQYZY, «Egemen Qazaqstan» AQTAÝ