Búgin, 21 tamyz kúni fýtboldan Qazaqstan chempıonaty premer-lıgasy 24-týrynyń qalǵan oıyndary oınaldy. Keshe bastalǵan bul týrdyń 1-6 oryndar úshin talasýshy tobynyń alǵashqy eki oıynynda Almatynyń «Qaıraty» óz alańynda «Aqtóbeni» 3:1 etip utsa, «Ertis» Pavlodarda Kókshetaýdyń «Oqjetpesinen» 0:2 bolyp utylǵan edi.
Jeksendi kúni «Astana» óz alańynda Shymkenttiń «Ordabasysyn» qabyldap, 2:0 esebimen tize búktirdi. Goldardy 2-mınýtta Azat penaltıden, Patrık Tvýması 50-mınýtta oıyn kezinde saldy. Elorda fýtbol komandasy osy jeńisinen keıin «Qaırattan» 7 upaı alǵa ketip qaldy.
Bul kúni sondaı-aq 7-12 oryndar úshin oınap jatqan komandalar da ózara kezdesti. Taldyqorǵanda «Jetisý» Qostanaıdyń «Tobylynan» 2:0 esebimen basym tústi. Goldardyń avtorlary – Narek Beglarıan (65) men Artem Kasıanov (76).
Qaraǵandynyń «Shahteri» munyń aldyndaǵy eki jeńisinen keıin óz alańynda jankúıerlerin renjitti. Kenshiler komandasy bul joly Oraldyń «Aqjaıyǵyn» qabyldap, 0:1 esebimen utylyp qaldy. Qonaqtar kezdesý taǵdyryn sheshken jalǵyz goldy 57-mınýtta soqty. Ony Freddı Koronel dál uryp túsirdi.
Al «Taraz» óz úıinde «Atyraýdy» 1:0 etip súrindirdi. Goldy Malık Mane 70-mınýtta óz esebine jazdy.
Damır QOJAMQUL
https://youtu.be/bS7TViVjXoo