Qazaqstan shahmat federasııasy Úndistannyń Bhývanesvare qalasynda 20 jasqa deıingi jastar arasynda ótken álem chempıonatyn jeńip alǵan Dınara Sádýaqasovaǵa 1 mln. teńge syıaqy tabys etedi.
Bul synda Dınaranyń ókshesin basyp kele jatqan reseılik shahmatshy Dınara Dordjıeva sońǵy partııada úndi Darııa Parnalıdi jeńe almaı, teń oınady. Dınara Sádýaqasova da sońǵy oıynynda Mońǵolııanyń ókilimen teń tústi. Reseılik shahmatshynyń teń oıyny qazaq qyzyna álem chempıony atanýǵa múmkindik berdi.
Sóıtip, 19 jastaǵy otandasymyz álemdik dodada 13 týrda 9,5 upaıy jınap, chempıon atandy. Ekinshi oryndy úndi Pıvı Nandhıdha, úshinshi oryndy reseılik Dordjıeva ıelendi.
Osy dodada jasóspirimder arasynda 16 jastaǵy amerıkalyq Djeferı Sıýn bas júldeni jeńip aldy.
Búgin Qazaqstan shahmat federasııasynyń prezıdenti Ǵalymjan Esenov Dınara Sádýaqasovaǵa quttyqtaý hatyn joldady. Onda: «Sizdi barlyq qazaqstandyqtardyń, shahmat federasııasynyń jáne ózimniń jeke atymnan jeńisińizben quttyqtaımyn. Qazaqstan shahmat federasııasy sizge álem chempıonatynda jeńiske jetkenińiz úshin 1 mln. teńge kóleminde syıaqy berý týraly sheshim qabyldady. Álem chempıonatyn jeńip alý - Qazaqstan shahmatynyń úlken jetistigi. Sizge jańa jeńister tileımin. Aldaǵy kezde de elimizdiń namysyn halyqaralyq arenada laıyqty qorǵap júre berýińizge tilektespin», delingen.
Dastan KENJALIN
Foto: Qazaqstan shahmat federasııasy