Álem chempıonatynda top jaryp, Rıo Olımpıadasynyń qola júldesin alyp úlgergen aýyr atlet Aleksandr Zaıchıkov qazaqshaǵa sýdaı. Kishkentaıynan qazaq balalary arasynda ósken Sashanyń munysyna kóp jurt tańǵalǵanymen, ákesi Vıtalıı Anatolevıch onshalyqty qaıran qala qoımaıdy.
– Vıtalıı Anatolevıch, Sashanyń aýyr atlet bolatyny qaı kezde baıqaldy?
– Ulym kishkene kúninen qoldy-aıaqqa turmaıtyn shıraq bolyp ósti. Muny jurt ta baıqaıdy eken. Bir kúni úıge Ǵalym degen jas jigit keldi. О́zi meniń balamnyń qolynan ustap alypty. Basynda Sasha birdeńeni búldirip qoıdy ma eken, dep kipi alyp qalǵam. Sóıtsem, kelgen jigit grek-rım kúresiniń jattyqtyrýshysy eken, ulymdy syrttaı kórip júrip, ózine shákirt etip almaqshy bolypty. Buǵan deıin sporttyń karate, velosport, fýtbol, basketbol sııaqty biraz túrlerine qanyǵyp ósken ulym kúreske barýǵa yntalylyq tanytty. Osylaısha bárin kúresten bastady.
– Al aýyr atletıkaǵa qashan aýysty?
– Kúresip júrgen kúnderinde qazirgi jattyqtyrýshysy Almas Abdraev kórip qalyp, birden aýyr atletıkaǵa shaqyrady. Shamasy, dene bitimine qyzyǵyp qalsa kerek. Sashanyń ózi de oǵan qýana bardy.
– Ulyńyzdyń tuǵyrdaǵy taıtalasyn kórgen shyǵarsyz?
Adamda ondaı kezde uıqy bola ma, úıge týǵan-týystar men dostardyń bári jınalyp, tańdy birge atyrdyq. Janymyzda Sashanyń naǵashy atasy Vıktor Aleksandrovıch te boldy. Osy túnde bul kisi 69 jasqa toldy. Eki qýanysh qatar kelip, ol biraz tolqydy.
– Ulyńyz qalaı «qazaq» bolyp ketip júr?
– Biz áýelgide ol qazaq tilin balalarmen oınap júrip úırengen bolar dep oılaýshy edik. Onyń qazaqshany osynsha taza sóıleıtinin keıin bildik. Sasha ustazy Armannyń keńesimen qaladaǵy Jalańtós Bahadúr atyndaǵy sportta daryndy balalarǵa arnalǵan mektep-ınternatta oqydy. Onda barlyq pánder qazaq tilinde júretin edi. Biz balamyz osydan qıyndyq kóretin shyǵar dep qaýiptendik. Biraq ol sabaqty qazaq balalarymen birdeı oqyp, mektepti oıdaǵydaı bitirip shyqty.
Áńgimelesken
Rýslan IGILIK