Qazaq jýrnalıstıkasynda ózindik bet-beınesi bar Nurtóre Júsiptiń taıaýda ǵana «Myń qumyrsqa jáne biz» atty pýblısıstıkalyq maqalalardan turatyn jaqsy kitaby jaryq kórdi. Prezıdent syılyǵynyń laýreaty, «Qurmet» ordeniniń ıegeri, oıy ushqyr, qalamy qarymdy azamattyń kitabyna alǵysózdi senator, Qazaqstan Jazýshylar odaǵy basqarmasynyń tóraǵasy Nurlan Orazalın jazǵan eken. Shaǵyn ǵana tilek sózde kórnekti aqyn, Táýelsizdiktiń taǵylymdaryn, ulttyń azattyq jolyndaǵy qaryzy men paryzyn tereńinen terbegen avtordyń ataýly dúnıelerin jan-jaqty taldaı kelip, «Jýrnalıst Nurtóre Júsiptiń óz jáne ózge de tustastarynan erekshelenip turatyn bir qasıeti – kez kelgen máseleni kórkem oı, kesteli tilmen jetkize bilýimen qatar, kóterilgen máseleniń sheshimin kórsetetin naqty usynystar aıta biletindigi der edim», deıdi. Shynynda, áriptesimizdiń osy jınaqtaǵy qaı maqalasyn alsań da qabyrǵaly oı aıtyp, elimizdiń eńseli isterin maqtan etip, keı tustaǵy áttegen-aılarymyzdy da ashyp kórsetedi.
«Qazaqtyń kúni» dep atalatyn bólimde azat elimizdiń tirlik tynysy, Elbasy Nursultan Nazarbaevtyń kemel saıasatynyń negizinde atqarylǵan ister naqty dálel-dáıektermen berilip otyrady. Mysaly, eldiń birligi týraly oı qozǵaıtyn «Bólingen – bireýge jem bolady» degen pýblısıstıkalyq maqalasynda ár qazaqtyń pendelikke salynbaı, keńdikte qyzmet etý qajettigin atap, «Bólingen – bireýge jem bolady. Bólinbegen – basqa elmen teń bolady», dep túıin jasaıdy. Al ár jyl saıyn Astanada Elbasy júldesi úshin ótip kele jatqan «Qazaqstan barysy» týraly tolǵamynda ultymyzdyń aıtýly ulandary A.Nuǵymarov, B.Ystybaev, ózge de júrekti de bilekti uldarymyzdyń abyroıly isin kelisti til, kórkem oımen aıta kelip, sońynda «Jeńilgendi jer kóteredi, jeńgendi el kóteredi» deıdi. Kitaptaǵy ult zııalysy О́zbekáli Jánibekovtiń óz qolymen tikken sáýkelesin izdeýi de izgilikti is. Ol týraly kezinde belgili jýrnalıst Qalı Sársenbaı jazǵan eken. Osy qundy jádigerdi taýyp, keıingige úlgi kórsetsek degen nıeti quptarlyq.
Ekinshi bólim «Zamandas» dep atalady. Otanymyzdyń órkendeýine, rýhanı jaǵynan kemeldenýine óz úlesterin qosqan keshegi aıtýly Aqań – Aqseleý Seıdimbek, kórnekti jazýshy Dúkenbaı Dosjan, abzal azamat Musa Patteev jaıly jazbalardan alar úlgi molynan. Ásirese, Aqań aıtqan asyl sózdegi ıirimdi oılar, ilkim baılamdar kimdi de bolsa beıjaı qaldyrmaıdy. Sol sekildi búgingi belgili ǵalym S.Qozybaev, Otanymyzdyń qaryshtap damýyna óz úlesterin qosyp kele jatqan S.Úmbetov, Á.Jaqsybekov, ózge de qaıratkerler týraly saraptamalary, Qazaqstannyń halyq ártisi D.Joljaqsynovtyń shyǵarmashylyǵyna arnalǵan taldaýy, áriptesi Q.Sársenbaıǵa, qalamger zamandastary T.Shapaıǵa, J.Shashtaıulyna baǵyttaǵan maqalalary ádemi oqylady.
Jalpy, kitaptyń sońǵy baılam sózinde avtor irgeli elge iritki túsirmeý, ishki birlikke berik bolý, osy arqyly qazaqtyń bedelin kóterýge bolatynyn aıtyp: «Eı, ýaqyt! Eı, zaman! Kózińdi ashyp qazaqqa qara: esken jeldeı, kóshken seńdeı, qıyndyqty eńserip, qaıratty jıyp, belsenip, biz kelemiz!» dep el Táýelsizdiginiń 25 jyldyǵyn ataǵaly otyrǵan ulttyń búgingi tynys-tirshiligi alda da jalǵasyn taýyp, urpaqtar sabaqtastyǵy ulyqtala beretinin alǵa tartady.
Súleımen MÁMET,
«Egemen Qazaqstan»