Parlament Senatynyń depýtattary Murat Baqtııaruly men Bekmyrza Elamanov Jalaǵash aýdanyna qarasty birqatar aýyldardy aralady. Aldymen Tań aýylynda bolǵan senatorlar kásipker Imamzada Shaǵyrtaevtyń sharýa qojalyǵynyń jumysymen tanysyp, egin dalasyndaǵy eńbegine joǵary baǵa berdi.
«Tań» LTD» JShS bas dırektory I.Shaǵyrtaev 2003 jyldan beri sharýashylyqpen aınalysyp, aýyl áleýetiniń jaqsarýyna ólsheýsiz úles qosyp keledi. Mysaly, ol bıyl aýyldaǵy meshit pen balabaqshanyń kúrdeli jóndeý jumysyna qolǵabys etip otyr. Keńes dáýirinde salynǵan balabaqsha ǵımaratynyń kúrdeli jóndeý jumystaryn keler jyly aıaqtaý josparlansa, meshitti bıyl paıdalanýǵa berýdi josparlaǵan. Qos senator saýapty isti qolǵa alǵan aýyl kásipkeriniń bul bastamasyna alǵysyn bildirdi. Al aýdan ákimi Talǵat Dúısebaev jalpy óńirde atqarylyp jatqan jumystarmen tanystyrdy.
Munan soń M.Baqtııaruly men B.Elamanov Aqqum aýylyndaǵy «Shuǵyla» balabaqshasynyń kúrdeli jóndeý jumystarymen tanysty. 1975 jyly boı kótergen ǵımarattyń qurylys jumystaryna respýblıkalyq bıýdjetten jáne jergilikti bıýdjetten qajetti qarjy bólingen. Búginde kúrdeli jóndeý jumystarynyń 50 paıyzy aıaqtaldy. «SOFT Qyzylorda» JShS jóndeý jumystaryn osy aıdyń sońyna deıin aıaqtap, 31 tamyz kúni paıdalanýǵa berýdi kózdep otyr. Senatorlar balabaqshanyń kúrdeli jóndeý jumystaryn joǵary baǵalady.
Sonymen qatar, senatorlar oblys ortalyǵynda Qyzylorda qalalyq máslıhatynyń depýtattary, qoǵamdyq keńes músheleri, quqyq qorǵaý organdarynyń qyzmetkerleri, ustazdar qaýymymen kezdesý ótkizdi. Júzdesý barysynda elimizde qabyldanyp jatqan jańa zańdar, túıtkildi máseleler týrasynda keńinen áńgimelendi.
Erjan BAITILES,
«Egemen Qazaqstan»
Qyzylorda oblysy