«Uly Dala eli» etnofestıvali

erlik pen eldikti arqaý etti Pavlodar oblysynda 19-20 tamyz kúnderi Qazaqstan Respýblıkasynyń 25 jyldyǵyna arnalǵan «Uly Dala eli» etnofestıvali ótti. Baıanaýyl aýdany Eskeldi shatqalynda belgili aqyn, etnograf, tarıhshy, folklortanýshy Máshhúr Júsip Kópeıulynyń kesenesi ornalasqan. – Qasıetimen halqyna qor­ǵan, ósıetimen urpaqqa tuǵyr bolǵan babamyzdyń bul mekeni – jyl on eki aıda taǵzym etip kelýshi jamaǵattan úzilgen emes. Sondyqtan Máshhúr babamyzdyń kesenesi janynda qonaqúı keshe­nin ashý óte qajet boldy, – dedi Pavlodar oblysynyń ákimi Bo­lat Baqaýov. – Máshhúr Júsip babamyzdyń ult tarıhynda orny bıik. Osyndaı tulǵalardy dárip­teý, nasıhattaý qajet. Aldaǵy ýaqytta, osy mekendi odan ári damytý qarastyrylyp otyr. «Eskeldi» qonaqúı kesheni 40 adamǵa arnalǵan bólmeleri bar eki qabatty ǵımarat. Munda ashana jáne uly oıshyldyń memorıaldyq murajaıy ashyldy. Keshen qurylysyna «KAZENERGY» assosıasııasy demeýshilik etti. Qurylys quny 30 mln teńgeni qurady. Onyń qurylysyn «Stroımehservıs» JShS kompanııasy júrgizdi. «Uly Dala eli» etnofestıvali aıasynda oblys ortalyǵynda qazaq halqynyń dańqty batyry Malaısary tarhanǵa eskertkish qoıyldy. Eskertkishtiń ashylý saltanatyna Pavlodar oblysynyń ákimi Bolat Baqaýov, «Malaısary tarhan» qoǵamdyq qorynyń prezıdenti Tıto Syzdyqov, tuń­ǵysh qazaq ǵaryshkeri Toqtar Áýbákirov jáne basqa da qurmetti qonaqtar qatysty. Eskertkishtiń avtory – belgili músinshi Bolat Qusaıynov. Eskertkish birneshe sáýlet elementinen quralǵan birtutas kompozısııadan turady. Kompozısııanyń birinshi bóligin – bıiktigi 60 sm tórt  baspaldaq, ekinshi bóligin – bıiktigi 4,4 metr úsh baspaldaqty tuǵyr, úshinshi bóligin – bıiktigi 5 metr mystan jasalǵan tulpardyń ústindegi batyrdyń tulǵasy quraıdy. Eskertkishtiń qurylysyna tegistelgen tabıǵı granıt paıdalanylǵan. Etnofestıvaldiń negizgi sharalary oblys ortalyǵyna ir­geles Kenjekól aýyly mańyndaǵy ózen ańǵarynda jalǵasty. Dýmanǵa Reseı Federasııasynan, Qyrǵyz Respýblıkasynan jáne Mońǵol Halyq Respýblıkasynan kelgen qandas aǵaıyndar men qurmetti qonaqtar qatysty. Etnoaýylda elýge jýyq kıiz úı tigilip, dastarqan jaıyldy. Qonaqtar ulttyq taǵamdardan dám tatty. Sonymen qatar munda qol­óner buıymdarynyń  kórme-jármeńkesi de kópshilik kóńilinen shyqty. Aımaqaralyq «Kánekı, sóıle, qyzyl til» atty aqyndar aıtysy uıymdastyryldy. Al «Qulager» ıppodromynda ót­kizilgen dúbirli alamanǵa Pav­lodar, Almaty, Shyǵys Qazaqstan oblystarynan  qyryqqa jýyq sáıgúlik qatysty. Báıgeniń bas júldesine jeńil avtokólik qoıyl­dy. Festıval  Pavlodar qalasynyń ortalyq jaǵajaıynda ótken gala-konsertpen aıaqtaldy. Konsertke belgili  kúıshi Aıgúl Úlkenbaeva, tanymal ánshi Aıgúl Qosanova, «Turan» etno-folklorlyq toby jáne «Qońyr» etnotoby qatysty. «Egemen-aqparat»