Qarttyqtyń toqpaǵy eńsesin tuqyrtqan aq sary óńdi qarııa búgin qatty qapalandy. Munshalyqty mazasyzdanýynyń sebebi, ózge úshin túkke turmaıtyn nárse bolyp kóringenimen, ózi úshin óte mańyzdy.
Ol tústik astan soń, sál-pál myzǵyp alyp, tysqa shyqpaq bolǵan. Dál sol kezde qolynan tastamaı, taıanysh etip kele jatqan aq taıaǵy tabylmaı qaldy. Dálizde ydys-aıaq jýyp júrgen kelinin shaqyryp, surap edi ol bilmeıtin bolyp shyqty. Dáý de bolsa, nemerelerdiń bireýi oınap alyp ketken bolar dep, qolymen amaldaı turyp, esik aldyna shyqqanda munyń aq taıaǵyn qaq bólip, bir jartysynyń ushyn baltamen úshkirlep otyrǵan eń kenje tentegin kórdi. О́ziniń kók esegin shuqıtyn nárse jasap otyrǵanyn sezdi. О́zi de talaı jasaǵan ǵoı ony. Sonysy birden esine túsip, tamaǵyna ashy óksik tirelip, turyp qaldy. Lám-mım demedi. Atasynyń pushaıman bolyp turǵan halin ańǵarǵan kelini: «Ata, soǵan bola nesine renjısiz, balańyz kelsin, sizge odan da zor taıaq jasap bergizemiz. Tipti tobylǵynyń ózinen», – dep qosyp qoıdy. Aqsaqalǵa kelininiń sózi áser etken joq.
Shyn máninde, álgi taıaq munyń qymbat dúnıesi bolatyn. Ony týǵan aǵasy Tańjaryq sonaý Qarataýdyń qoınaýyndaǵy ushqattyń oqtaı túzý butaǵynan kesip ákelip: «Erteńgi kúni belińnen kúsh ketkende tirek etersiń», – dep bergen edi. Oǵan da otyz shaqty jyl bolyp qalypty-aý. Kópten beri sol taıaqty janyna serik etip, qolynan tastaǵan emes. Endi mine, osy qymbat múlki nemeresiniń qolynda ketti. Oıyn balasy ǵoı, ne túsinedi, táıiri...
– Iаpyraı, kesheginiń múlki edi. Sońy jaqsylyq bolǵaı, – dep kúbirledi qarııa.
Ol qalt-qult etip, úıge qaıta kire bergen. Aýladan úlken ulynyń daýdyrlaǵan daýysy shyqty. Ol áıeline: «Kókem esitti me, Tańjaryq atam dúnıe salypty», – dep jatyr eken. Qarııa qaraly qazany estigen boıda sylq etip otyra ketti. «Báse, – dedi qarııa, – ótkenniń bári nege esime tústi desem... Myqty taıaqtar osylaı synady ǵoı».
Joldybaı BAZAR,
«Egemen Qazaqstan»