Túrkııa Eýrazııalyq ekonomıkalyq odaqqa qosylýǵa nıet bildirip otyr. Biraq ol muny óziniń Eýropa odaǵymen qarym-qatynasyna zalal kelmeıtindeı etip jasaǵysy keledi. Daily Sabah gazetiniń jazýynsha, bul týraly Túrkııanyń ekonomıka mınıstri Nıhat Zeıbekchı málimdegen.
«2015 jylǵy 24 qarashada Reseıdiń ushaǵy joıylyp jiberilgenge deıin biz bul jóninde Reseımen kelisim jasasyp jatqanbyz. Reseı prezıdenti Pýtınniń Túrkııaǵa sońǵy sapary kezinde biz Reseı ekonomıka mınıstrimen birge Erkin saýda aımaǵyn qurý týraly negizdemelik kelisimge qol qoıǵanbyz. Endi sol kelisimdi jalǵastyryp, múmkindiginshe tezirek aıaqtaǵymyz keledi», - dedi Zeıbekchı.
Onyń aıtýynsha, Erkin saýda aımaǵy qyzmet kórsetý men ınvestısııanyń birinshi sektoryn qamtıtyn bolady. Budan ári taraptar munda ónerkásip óndirisin, sonyń ishinde aýyl sharýashylyǵy sektoryn kirgizýdi josparlap otyr.
Sonymen qatar, Zeıbekchı Túrkııa óziniń Eýropa odaǵymen baılanysyna zalal kelmeıtindeı shart arqyly EAEO-ǵa múshe bolýǵa da qarsy emes ekenin jetkizdi.
«Reseı quramyna Belarýs, Qyrǵyzstan, Qazaqstan jáne Armenııa kiretin Eýrazııalyq keden odaǵyn basqarady. Árıne, biz Eýrazııalyq keden odaǵynda bolǵymyz keledi. Alaıda, ol Túrkııanyń Eýropa odaǵyna kirý úderisine kedergi keltirmeıtindeı bolýy kerek», dedi ol.
Murat AITQOJA