sportshylarymyzdy Astana qushaq jaıa qarsy aldy
Astanaǵa Rıo-de-Janeıro qalasynda ótken jazǵy Olımpııalyq oıyndardan júlde alǵan sportshylarymyz keldi. Olardy Astananyń halyqaralyq áýejaıynda qala halqy erekshe qurmetpen, sán-saltanatpen qarsy aldy. Áýejaıǵa jınalǵan jurtshylyq elimizdiń kók baıraǵyn jelbiretip, «Alǵa, Qazaqstan!» dep urandatyp, sportshylar men jattyqtyrýshylarǵa qurmet kórsetti.
Saltanatty sharada Astana qalasynyń ákimi Áset Isekeshev Olımpıadadan júldeli oralǵan Qazaqstannyń bokstan, erkin kúres pen áıelder kúresinen ulttyq qurama komandalaryn quttyqtady. Ol sahna tórine shyǵyp, elimizge tórt jylda bir keletin dodadan jeńis týyn ákelgen Olımpıada júldegerleri men olardyń jattyqtyrýshylaryna qarata sóz sóılep, bul jeńisterdiń mańyzdylyǵyn atap ótti.
Qala ákimi óz sózinde olımpıadashylardyń jeńisi myńdaǵan jas jigitterimiz ben qyzdarymyzdyń sportqa degen qyzyǵýshylyqtaryn oıatqanyn, endi elimizde Olımpıada shyńyna shyǵýdy ómirlik maqsaty etip aldyna qoıatyn jasóspirimder sany kóbeıetinin, osynyń barlyǵy Memleket basshysy Nursultan Nazarbaevtyń halyq arasynda salamatty ómir saltyn qalyptastyrýda, buqaralyq jáne kásibı sportty damytýda júrgizip jatqan syndarly, salıqaly saıasatynyń arqasynda múmkin bolyp otyrǵanyn atap ótti.
Osydan keıin qala basshysy Á.Isekeshev qalyptasqan dástúr boıynsha Olımpıada chempıony men júldegerleri memleket tarapynan marapattalatynyn, olarǵa tıisti syıaqymen qosa Astanadan páterler beriletinin aıtty. Ol osy jerde syı-qurmettiń basy retinde boksshylar Danııar Eleýsinovke, Vasılıı Levıt pen kúres sheberi Gúzel Manıýrovaǵa jol talǵamaıtyn kólikterdiń kiltin tabys etti.
Saltanatty sharada sportshylar ózderine qoldaý kórsetken aǵaıynǵa alǵys bildirdi. Onda Danııar Eleýsinov, Gúzel Manıýrova men Vasılıı Levıttiń anasy Tatıana Levıt jurtshylyq aldyna shyǵyp, elimizde sportty damytýǵa barlyq jaǵdaı jasap jatqan Memleket basshysyna, Astanada qala ákimine, ózderin jarysqa daıyndaǵan jeke jattyqtyrýshylaryna, komandanyń bas jattyqtyrýshysyna, bapkerler shtabyna rızashylyqtaryn jetkizdi.
Saltanatty shara aıaqtalysymen sportshylar júzderi bal-bul janǵan balalarmen estelik sýretke túsip, jankúıerlermen jarys týraly syrlasyp, elge degen saǵynyshtaryn tarqatty.
Dastan KENJALIN,
«Egemen Qazaqstan»
Sýretti túsirgen
Erlan OMAROV,
«Egemen Qazaqstan»