Aqtaý teńiz portynda Armııa halyqaralyq oıyndary sheńberinde Mahachkalada teńiz bıatlony boıynsha saıysta ekinshi oryndy enshilegen «Saryarqa» jáne «Oral» zymyran artıllerııalyq kemeleriniń ekıpajdaryn saltanatty túrde qarsy alý rásimi boldy.
Qazaqstan Respýblıkasy Áskerı-teńiz kúshteriniń kemeleri Reseı Federasııasynyń sý aıdynynda jeńip alǵan «Admıral» katerimen oraldy. Byltyr Qazaqstannyń teńizshileri ekinshi oryndy ıelenip, BL-80 katerin utyp alǵanyn aıta keteıik.
Teńizshilerdi saltanatty qarsy alý QR QK ÁTK týynyń kóterilgen kúniniń 20 jyldyǵymen atap ótildi. Áskerı teńizshiler úshin bul kún ataýly datalardyń biri bolyp tabylady. Osy kúnge oraı, soǵys, Qarýly Kúshter ardagerleri, oqýshylar men stýdentter úshin 29011 áskerı bóliminde ekskýrsııa uıymdastyrylyp, jańa áskerı tehnıkalar kórsetildi.
«Áskerı-teńiz kúshteriniń jeke quramy Kaspıı teńizinde Áskerı-teńiz týyn ári qaraı abyroımen kóterýdi jalǵastyryp, ózderiniń aldyna qoıylǵan oqý jáne jaýyngerlik tapsyrmalardy oryndaý úshin barlyq kúsh-jigerlerin salatynyna kámil senimdimin. Áskerı-teńiz týy kóterilýiniń 20 jyldyǵymen taǵy bir márte quttyqtap, dástúr boıynsha saparlaryńyz sátti bolsyn», – dep zapastaǵy kontr-admıral Kenjemergen Ábikeev óziniń lebizin bildirdi.
20 jyl buryn Aqtaý qalasynyń 4-shi shaǵyn aýdanynda 1-dárejeli kapıtan R.Islamov Táýelsiz Qazaqstannyń áskerı-teńiz týyn alǵash ret kótergenin esterińizge sala keteıik.
«Egemen-aqparat»